Shillong, 19 Lber:

Wat la ki Karkhana dewbilat ha ka jylla, khamtam kiba na Jaintia Hills ki la jyllei bha bad ki la kular ban bud ia kaei kaba la bthah ha ka Land Transfer Act ban pynmyn-toi ia ka jylla da kaba ai kam ai jam ia ki trai muluk trai jaka, pynmyntoi ia ki trai jylla da ki bun rukom ki kam ki jam bad pyn-duna ia ka dor dewbilat na ka bynta ki paidbah jong ka jylla, khamtam kito kiba ha thain Jaintia Hills, hynrei mynta ki jingleh jong ki, ki long mar-khongpong.Ki paidbah nongthied dewbilat bad kumjuh ruh ki nongkhaii ki la kynnoh ba,ha ka liang jong ka thungkam thungjam kim da don eh ki trai jylla kiba ioh kam, lait noh tang khyndiat ngut eh ha kine ki karkhana. Nangta, ki la kynnoh ruh ba tang khyndiat ngut eh kiba ioh jingmyntoi kam business bad pynroi ia ka ioh ka kot jong ki trai jaka trai jylla, Nangta, ka dor die ia ka dewbilat ruh la pynrem tasam. Ki la kynnoh ruh ba ka dor ba pynmih ha karkhana ka long malu mala tang T.175/- shi byrni hynrei ynda la poi ha ki nongthied pat ka dor ka la kylla long T.330 ne 340 haduh 350 shi byrni. Bun ki paidbah kiba thied dewbilat na ki dukan ki ud bad ki khnium jur bad kumjuh ruh ki nongdie ha ki dukan ki takor tyngeh ia ki karkhana ba ki ohdor kput ia ki bad ki paidbah.

Kine ki la kynnoh ba kine ki karkhana ba la ai jingbit da ka sorkar ban tei ha ka jylla, ki la pyndonkam bakla pynban da kaba kjit ia ka spah na ka jylla. Ki la kynnoh ruh ba kine ki karkhana dkhar kiba la don naduh ki snem 2006-2007 ki ioh bun ki subsidy hynrei kumno ki dang ohdor kput ia ka dewbilat, ha ka jingshisha ki la dei ban ohdor duna bha. Ki la ong ruh ba ka dor dewbilat jong kine kijuh ki kompeni ha Assam ki kham tad shibun ban ha Meghalaya.Ki la kyntu jur ia ka sorkar ba kan leh tyngeh pyrshah ia kine ki kompeni kjit spah.