Shillong, 29’lyngkot:
U CEM ka KHADC u bah Pynshngaiñ N Syiem u la pynbna paidbah ba mynta ka sngi ka 29 tarik u kyllalyngkot kan dei ka sngi ba dum ia ka jait bynriew bad ban pynpaw ia kate ka jingtah tap u lyoh dum ia ka jaitbynriew u la pynbna ba kan don ka jingdeng lama iong ki MDC bad ki nongtrei jong ka KHADC ban pyrshah ia ka rai ka sorkar ban pyn kylla thymmai ia ka Meghalaya Services and Conduct Rules kaba la khang pyrshah ia ki nongtrei sorkar ban bat kam Rangbah Shnong lane ban long dkhot ha kino kino ki kynja seng ne kynhun. U CEM u la kyntu ruh ia baroh naduh ki nongshong iew shonghat, ki kali bad ki paidbah nongshong shnong ba kin ia shim bynta lang baroh katei ka jingdeng lama iong kaba la lam khmat da ka KHADC.
Tang ia dei ka por longtrei ki nongtrei ka KHADC, u nongthohkhu bor u la poi sha katei ka ophis bad la iohi ba la don ka jingpyndeng lama iong ia ki baroh ki nongtrei ka KHADC, hynrei kham hadien ba la leit ban peit sha ki kamra jong ki EM u nongthohkhubor u lalap ba ym shym don kiwei pat ki EM ha katei ka sngi lait noh u CEM bah Pyn shngaiñ, Dy.CEM bah Process T Sawkmie bad kham hadien la wan mih sa u bah James Sylliang, EM jong ka tnad khaii pateng. La kumba katto katne por u nongthoh khubor u la don ha katei ka jaka bad u la leit peit ha kiwei pat ki kamra jong ki EM.
Hynrei kaei kaba la lap ka long ba ym shym don briew ha kamra jong ki EM ka KHADC, lait noh u bah Albinus Lyngdoh uba rung ba mih shiphang shiphang na kamra treikam jong u. Kiwei pat ki EM ne ki MDC jong ka seng Congress ym shym la iohi ha katei ka jingdeng lama iong ha katei ka sngi haduh ka por 3 baje. Hynrei haba pyrshang ban phone ia ki,katto katne ngut na ki ki la jubab ba ki la poi dier por naba ki don prokram shawei, hynrei katto katne ngut na ki kim shym la shim ia ka phone haba u nongthohkhubor u la pyrshang ban phone ban kylli ia ka daw bym shym la iohi ia ki.
Katei ka prokram ia khih jar jar u CEM ka dei ka prokram kaba la pynbeit la kumba ar taiew duna eiei, hynrei kaba lyngngoh ba kat katei ka prokram ki dang don ki EM kiba bunkam ban leit prokram shawei bad ki dang don ruh kiba wan poi dier por sha ka jaka trei jong ki naba ia katei ka prokram la pynbna ba kan sdang beit naduh ka por 11 baje mynstep.
Shibun ki jingkylli ki la phalang halor katei ka jingjah trei bad ka jingpoi dier por ki MDC Congress kiba shong ha ophis ka KHADC mynta ka sngi ba katei ka ophis ka ia khih, don katto katne ngut ki MDC kiba la ioh jingtip ba ki leit ban ia kynduh ia ki heh jong ki ( MLA) ban pan jingbit bad ban ia phylliew jingmut shuwa bad ki heh jong ki lane ki MLA shuwa ban leit ia shim bynta ha katei ka prokram ia khih ka Khih pyrshah sorkar Congress ka KHADC.
Ki phalang ruh ki jingkylli mynta hato la ka don eiei kaba rieh hapoh ka kynhun ka PDF kumba la paw mynshuwa ba kan don kata ka jingpynkhih ia ka shuki u bah Pynshngaiñ N Syiem, haba wad jingtip ia kane u nongthohkhubor u la ioh jingtip ba haduh mynta kaba sah hi ka long ba ki MDC Congress ki shu ap bad shu peit ia ka jingbate kam thymmai u CEM uba la ong ba kan don ka jingbate kam thymmai ha kano kano ma ka por bad ka jingpeit siar jong ki mynta ka long ba hato u CEM u nud mo ban pynkhih ia ka shuki EM ba shong ki MDC Congress?. La sngewthuh na katei ka jingiakren bad katto katne ngut ki Congress ba lada jia ba ka don ka jingbate kam thymmai ha KHADC bad lada jia ba ki MDC Congress kin shah pynhap shuki noh khlem pep ka shuki u bah Pynshngaiñ N syiem kan twa kumba twa u lumbah.