Shillong, 19 Lber:

U MLA ka Sohiong konstitwensi u bah HDR Lyngdoh uba dei ruh u myntri kam pohing ka sorkar jylla u la ong “Nga kloi ban ktah nakjat jongno jongno ruh na bynta ka jingmyntoi u paidbah” ong u bah HDR haba kren ha ka jingialang kaba u la leit ban jurip ia ka jingsdang ban pyntreikam ia ka ïew thymmai jong ka Sohiong kaba la mang tyngka haduh T.11 klur shiteng.

Katei ka jingkren u bah HDR ka dei kaba u la iathuh khana ha katei ka jingialang shaphang ka jingiaid lynti jong u kumno ban wanrah ia ki kam pynroi ha Sohiong konstitwensi naduh ka C&RD Block bad kiwei pat, “Ngi la ia khun ban ioh la ka jong ka Block, ngi la leit ban ia kren bad u myntri rangbah ka jylla bad u la ong ba un sa peit, nyngkong nga la duh jingkyrmen, hynrei khlem poi pyrkhat katba ngi dang ia don ha kawei ka jingialang ha State Convention Centre u la pasiaw ia nga bad u la ong ba la mynjur ban thaw ia ka C&RD Block Sohiong. Nga la kmen palat ha katei ka por naba kaei kaba ngim poi pyrkhat ka la urlong bad ha katei ka por da ka jingkmen nga la shim ia ka kti u myntri rangbah nga la buh ha shyllang kum ka dak ka jingburom (u pyni artad da kaba shim ia ka kti lajong), hynrei don pat kiba pynsngewthuh bakla ia kane bad ki la ong ba nga doh ia ka kti u Dr.Mukul bad nga la pynhiar dor ia ka jaitbynriew” ong u bah HDR Lyngdoh.

Shuh shuh u la pynkynmaw biang ba ha ka por ba u long myntri kam pohing ha ki snem ba la dep ka la don ka jingiakhih kaba shyrkhei bha ha ka jylla, na bynta ka ishu MBOSE bad hangtei ka sorkar ka la kulmar jingmut bad kam lah ban pynjem kumno kumno ruh ia ki seng bhalang, “Nga la khot ia kren ia ka GSU ha ri Lum Garo, ia kren kumno kumno ruh ban pynjem ym long, nga la ktah na khohsiew jong u President ka GSU ban kyrpad ban weng noh ia ki jingiakhih bad ka la thanda jai-hadien ba mih ki sengbhalang u DG u ong ia nga phi la pynpoh ia ka burom lajong ban lem kumto, nga ong ym lei lei na bynta ka shongsuk shongshngaiñ bad ka jingbha ki paidbah, ngam salia wat ban ktah na kjat jongno jongno ruh lada kaei kaba nga leh kan dei ka jingmyntoi u paidbah” ong biang u MLA ka Sohiong.

Katei ka jingringksai jong u ka dei halor jingiaid lynti jong u ban pynioh ia ka Sohiong mynta sa ia ka ïew nongkyndong kaba heh (Rural market) ha ka jinglut kaba T.11 klur shiteng kaba la sdang shaid shaid ban trei mynta kaba u la ong ba ka dei naduh ka por ba long myntri DoNER u bah Ripple Kyndiah (Bam kwai ha dwar u blei) bad u la ong ba ka dei ka jingthmu naduh ka por ba u dang long u Lyngdoh Sohiong naduh u snem 1977 haduh u snem 1988 shuwa ba un rung sha ka politik. Ha katei ka jingialang u la pynsngew ba ka plan ia katei ka iew ka dei ban tei ia ka iew kaba lai mala, ka mala ba ha trai duh ka dei ban ieng kali bad ar mala pat ban buh dukan bad ia katei ka iew yn long trai da ka Sohiong. U la ong ba ka jingdon katei ka iew kan pynriew spah ruh ia ka Hima naba kin lah ban kamai pisa lyngba ki bai-wai dukan bad kiwei pat ki khajna, u la ong ba kan don ruh ka jaka buh mar-rep kaba heh bha kaba 11oo sq.ft bad kaba lah ba nngiam haduh 14 trok ki mar-rep.

Ha katei ka jingialang la donlang u Lyngdoh ka Sohiong u bah Bashemphang Lyngdoh Thabah, u BDO ka Sohiong u bah M.A Challam, u Joint Director C&RD u bah J.Massar, kong I.Iangrai Project Director EKH, ki enjiniar kiba la plan bad ki ban peit ia ki kam katba ka jingtrei ka dang iaid bad la don ruh ki longkmie ki rangbah. Ka jingpyntrei ia katei ka iew kaba thymmai ka dei ha ka iew kaba rim kaba la pynpra noh mynta bad la pynkynriah shipor ia ka iew mynta sha kawei pat ka jaka kaba don marjan.