Shillong, 19 Lber:

U MLA ka Mawlai konstitwensi u la kyndit ban shah kynthah ha ki ar tylli ki sengbhalang na Mawlai ka FKJGP bad HYC da kaba kynnoh ba um shym la kren eiei hapoh Ing Dorbar Thaw-aiñ ka jylla halor ka mat C&RD Block Mawlai. U bah Embhah u la ong ba dang ha ka 10 tarik u lber ruh u la kren ia katei ka mat ha ka por ba u myntri rangbah ka jylla u la wanrah ia ka mat ia kren halor ka mang tyngka. U MLA ka UDP na Mawlai u la khot ia kitei ki sengbhalang ban ia treilang ba ka jingiakhih halor ka Mawlai C&RD Block kan long kaba jop bad u la kyntu ruh ba haba kim tip ia ka jingshisha kim dei ban ialam bakla ia u paidbah, “Haba ym tip ia ka jingshisha, wat ialam bakla ia ki paidbah” ong u bah Embhah Syiemlieh haba ia kren bad ki nongthohkhubor da kaba kyntu ruh ia ka FKJGP bad HYC da kaba khot ruh ba kin wan ban ia treilang na bynta ka jingmyntoi ki paidbah. Shuh shuh u bah Embhah u la ong “Ngam shym la sngap jar jar, nga la iai kren, nga la buh jingkylli halor ka C&RD Block Mawlai hynrei ka pali ban jubab u myntri rangba kam pat poi kan poi haduh ka lah sngi u blei, tangba kam mih ha kotkhubor kam mut ba nga khlem kren eiei” u la ong da kaba bynrap biang “Ka long kaei kaei kaba ialam bakla ban ong ba nga khlem kren eiei, lada dang don mano mano ba sngew artatien ba ki ong nga khlem kren , ki lah ban pan ia ka jingkren ne ka Proceeding na ka tnad ba peit ia ka Ing Dorbar Thaw-aiñ” ong u bah Embhah.

Utei u MLA ka Mawlai u la ong ba u khlem shongthait ban khih ban ksaid na bynta ka Mawlai C&RD Block bad u la iai dawa na ka sorkar ba ka dei ban buh beit hapoh u pud u sam ka Mawlai bad ban plie noh ia ka. U la ong ba u la dep ia syllok ruh bad kiwei kiwei pat ki MLA jong kiwei ki konstitwensi ba kin hunlang ia ka jingdawa ban buh hapoh Mawlai. U la pyntip ba u la lum ruh ia ki Rangbah Shnong ka Mawlai Town Dorbar ban ia pyrkhat biang halor katei ka bynta ban tynruh sha ka sorkar halor ka jingpynslem jong ka wat hadien ba ka Mawtawar ka la ai sngewbha ia ka jaka kaba heh haduh Ar akar ruh.