Shillong, 29 K’lyngkot: Ka UDP ka la pashat jingmut sha ki Chief Executive Member (CEM) ka KHADC, JHADC bad ka GHADC ba kin iashong lang ha kawei ka rynsan ban iakren ia ki kyndon kiba la bsuh ha ka Village Administration Bill namar ba ki iapher na kawei bad kawei pat.
Ha ka shithi ba la phah sha ki CEM jong kine ki lai tylli k ADCs, u general secretary ka UDP u Bah AF Dkhar u la ong ba ka jingialang bad ki Rangbah Shnong kaba la khot da ka party ha ka 16 tarik Kylla lyngkot, ka la iakren ia ki kam kiba iadei bad ka rai kaba mih na ka High Court Meghalaya ha ka 13 tarik Kyllalyngkot, 2016 kiba ktah ia ka synshar khadar shnong.
U la ong ba ka jing ialang ka la iakren halor ka JHADC(Establishment of Elaka and Village & Election, appointment, powers, functions and jurisdiction of Dalloi/Sirdar/Waheh Chnong)Act 2015, Section 21 kaba bai ba ka Dorbar Chnong jong kawei kawei ka shnong kan kynthup ia baroh ki nongshong shnong ba la rangbah katba ka Village Administration Bill (VAB) ka KHADC  ka la ong ba tang ki Khasi kiba lah ban long ki dkhot ka Dorbar Shnong.
Ka Dorbar Shnong ha Khasi bad ha Jaintia Hills la niew ba ki dei tang kiba dei ki Khasi bad Jaintia ym da kiwei pat kiba lah ban iashim bynta ha ka synshar ka khadar, ka imlang sahlang, ha kaba kiwei ki bym dei na ki Khasi ne Jaintia kim lah ban iadon bynta ha ka dorbar shnong /Chnong.
Hadien ba la iakren sania bha, la sngew dei ba kan long kaba dei eh bad kaba donkam ia ki lai tylli ki Autonomous District Council ban iashong lang ban iakren ia kane ka kam khang ban lah ban leh ryntih.
“Halor kane, nga kyrpad ia phi ban eksamin bad wad ia ki lad ki lynti da kaba shong jingialang baroh lai tylli ki ADC ban iakren ia kane ka kam  wat ban kiew sha ka iing lieh iingsaw”, la ong u Bah Dkhar.