Їaw ka Ryta, ih ka pyrkhat

Dorbar Khasi baїar, ba la seng longshwa manshwa;

Ban biang synshar khadar, la saiñdur ka ba nylla.

Longkñi te ki longkmie, ba la їh ka bor shemphang;

Ki kam ba kin sule, ban їa tei imlang sahlang.

La їaw te ka ryta, ah lah ih te ka pyrkhat;

Їengjoit ko khun samla, sha ka thong ban poi ryngkat.

Da U Bah Raphael Warjri

La ainam їa kane ka thup jynthoh ha ka kyrteng

I Meiieit Speliti Lyngdoh Langrin (Bam kwai ha dwar U Blei)

Ha ka juk mynta, bun ki ba tip shaphang ka dorbar Khasi ka long ka ba shong per bad ka ba la shu pynkiew skong tang їa u shynrang briew bad їuhroit їa ka longrynñieng jong ki kynthei. Kata ka dei namar ba ka longrynñieng rangbah la shu pynkap jyndei tang ha ki shynrang, ba sa mih ka jingong ba ym shah їa ki kynthei khynnah ban shong dorbar. Kane ka dei ka ba la sngewthuh bakla palat, namar ka nam rangbah ka kit jingmut lang salonsar, khlem da kheiñ kynthei ne shynrang їa kiba lah їaw ka ryta bad ih ka pyrkhat. Na kata ka daw khlem da sngewthuh la ka thymmei bun ha ka juk mynta ki la shu kren tang lait synhaw.

Ha ka juk mynnor ym don almanak ban kheiñ por kheiñ ryta, kumta ki longshwa manshwa ki shu peit їa ka rengmat jong ki khynraw bad ki khyllud bad ki bishar ba lah їaw ka ryta ka ba mut ba lada u shynrang u lah sdang speh ki tmaiñ la ñiew ba u lah їaw ka ryta bad la kumno kumno lah khajoh sha ka khatphra snem. Kumjuh ruh їa ki kynthei ki longkmie kin iathuh ha ka dorbar їing ba ka khun ka pyrsa ka lah їaw ka ryta ka ba mut ba la sngewthuh khlem da kdew ba ka lah sdang ban poi bnai bad ka thew ba la kumno kumno ka lah khajoh sha ka khatphra snem ka ryta. Kine kiei kiei ki dei ki jingshisha ba la thaw hi ka mariang ba ym dei ban thew akor ne ñiew thamula. Ki long ki jingshisha ha ka imlang sahlang naduh mynnor haduh mynta mynne, lada ym shah kie berong ha ka batai stad ki phareng. Hana ka pyrkhat khyllah sngi ba baroh u shynrang u dei ban don tmaiñ bad baroh ka kynthei la mana pyrshah ban shong dorbar.

Ha ka juk mynnor ha ba ki shynrang ki dei ban shang kylleng ki jaka na ka bynta ban kamai kajih na ka bynta ka longїing longsem, kumta ki hap ban thom їa ki raieh raidam bad buhti їa ki kynthei ban khmih la ka rympei їing. Kumta ka la kylla noh ka dustur ba ki kynthei ki korbar ha rympei bad ki shynrang ki korbar naphang shabar na la rympei. Ym tang katta ka bor shemphang jong ki longshwa manshwa ka long ka ba їar bad shynna ka phangma sha ki hajar ryta. Ki la tip lypa ba ka long ka ba syier їa ki kynthei kumki ba kha ba un ba kin thom їa ka raieh raidam kylleng ka mariang namar ba don ki bor mariang ki ba lah ban ktah ne pynjulor їa ka snap longkmie ha ka kha ka pun їa ka longbynriew. Kumta la jied ba ki kynthei kin neh ha la rympei bad ki shynrang kin thom їa ka raieh raidam. Hynrei ha ka dorbar baroh lang ki lah ban shahshkor tangba ki ban shim bynta ha ka tainia dei tang ki ba la jied da ka lynti jong ka dustur; kata ka mut mano mano ba mihkhmat na ka dorbar їing ki lah ban kren ha ka dorbar kur, mano mano ba mihkhmat na ka dorbar kur ki lah ban kren ha ka dorbar shnong, na ka dorbar shnong ha ka dorbar raij, na ka dorbar raij ha ka dorbar hima. Kumta lah ban їoh kiba kynsai ban їatai їamir nia ha la ki lympung dorbar. Kita ki ba mihkhmat ha ki dorbar kyrdan-pa-kyrdan ki dei ban long ki rangbah ki ba lah їaw ka ryta bad ih ka pyrkhat bad lah ban long mano mano kynthei ne shynrang; hynrei namar ba ju long hi ka akor naduh ka longїing ban jied rangbah da ki kynja longkñi, kumta ka la їaineh bad hiar pateng tang ha ki shynrang bad kylla ka dustur ka riti salonsar. Hynrei ki don ki khep ba ki kynthei ne longkmie ki ba la rangbah bad їaw ka pyrkhat ki ba mihkhmat їa la ka longїing ter ter, khamtam lada jia ba ym don shynrang briew ki ba kham iaw pyrkhat ne shemphang. Kumta kane ka rukom pyrkhat tynrai Khasi ka dang їahap ha kajuk mynta ruh, bad ki kynthei kim donkam ban dawa hok ban pyrta shla ha rynsan ne kyrkait ha lynti syngkien namar ka lah don lypa ha ka dustur ka bhah katkum ka bor shemphang ym katkum ka longkynthei.

Namar ba lah tyllep ka pyrkhat nongwei ka ba per ha la ka dustur lajong kumta la shah kie berong bad shong synjor ka bor sngewthuh їa la ka thymmei hangne ha jylla. Lah ban sngewthuh їa kane namar ba ka pyrkhat tynrai ka dang shongneh ha kiwei pat ki jaka ne ki shnong ki thaw Khasi kum ha them Barak bad rithor Sylhet ha Bangladesh. Ha kine ki thaw laju don barabor ki khep baki thei rangbah ne ki longkmie ki khlieh їa la ka dorbar shnong namar ka jingtbit bad ka bor shemphang. Wat ha ki khanatang ki ba lah ruh ban kam kum ki khanapateng ki don ki matti ba shynna ban kubur їa kane ka phang. Ha ba ka saw ka sian ka la wan hap shop ha ka Hima Sawkher Lailyngdoh, la mih ka Pahsyntiew ha ka dorbar ban tem їa ka ding jong ka kynad ka kajia haduh ka khep ba la jied ban long ka longkmie nongkha syiem ha ka hima bad na ka kpoh jong kalamih ki syiem Shyllong bad sa їaineh ka Hima Shyllong ka ba la phiah pat sha ka Hima Khyrim bad Hima Mylliem da ki buit mushlia jong ki phareng. Ha ka juh ka rukom ka la jia їa ka Hima Sutnga lyngba ka kpoh longkmie nongkha syiem jong ka Li Dakha, hynrei їa kane ruh la pynduh pyndam da ki phareng. Kumjuh ka la jia їa ka Mei Khmah kur Nongsai jong ka Hima Mawphlang, ka Їang Langdoh jong ka Hima Thaїang, ka Luh Shadap jong ka Hima Їapngar, ka Syiem Latympang ka ba la kyrda tyngeh їa la ki khun ki hajar ha Ri Pnar haduh ban da phet їamrem sha Barato. Wat dang shen ha ka thma pyrshah ki mynder na shiliang duriaw, la paw shynna ka jingtbit jong ka Phan Nonglait ban їada їa la ka kur ka jait, ka hima sima. Ter ter haduh mynta mynne ruh la mih byllai ki longkmie ki ba tbit bad shemphang ban long khlieh nongsynshar lane tang kum ki longkmie ha ka imlang sahlang kumba la paw shynna ka pyrkhat bad ki kam jong I Meiieit Spiliti Lyngdoh Langrin ka ba palat liam їa u synñiang jong baroh ki nongїalam na thaiñ sepngi jong ka Bri Hynñiewtrep.