Yn ym pynkhyllem ka KHUDA ia ka ARPA ha KHADC

Shillong,
19 Rymphang:
Kham mynshuwa la ioh jingtip ba ka KHUDA ka lah ban wanrah ia ka jingiatynjuh bor ha ing dorbar ka KHADC namar ka jingbym shaniah ia ka EC ba mynta, hynrei kham hadien la ioh jingtip pat ba ka liang pyrshah hapoh Khasi Hills Autonomous district Council ka KHUDA ka lah ban kynran dien noh na ka jingthmu ban ia tynjuh bor hapoh ing dorbar ka KHADC ka ban sdang ha ka 23 tarik mynta u bnai, iathuh ki lad khubor ba la ioh lum mynta ka sngi. La ong ba katei ka jingran dien noh ka KHUDA na ka jingthmu jong ka ban ia tynjuh bor ha KHADC ka dei hadien ba kam shym la lah ban khroh ia kiwei pat ki MDC kiba don hapoh ka ARPA.
Kham mynshuwa ki lad khubor ki la iathuh ba ki MDC ka seng Congress ki la leh pariah bha bad ki la leit ban ia kren bad katto katne ngut ki MDC kiba don hapoh ka ARPA bad katei ka jia tang shisngi ar sngi hadien ba uwei na ki MDC uba don hapoh ka ARPA u bah Pyniaid S Syiem u la pyni dak or pait da kaba byrthen ban pynkhyllem ia ka EC kaba mynta.
Haba buddien bha, ia ka sain pyrthei hapoh district council, u Rupang u la ioh lum jingtip ba haduh mynta kiba khih met khih phad ban ia pariah briew ki dei tang katto katne ngut ki MDC napoh KHUDA, hynrei la ong ba haduh mynta u nongialam jong ki u bah Pynshngain N Syiem um pat shem la khih met satia, bad kumjuh ruh kiwei pat ki MDC ba kham rangbah napoh ka KHUDA kum u bah Antonio War, u bah Jansing Tynsong , u bah Mansturdy Nongrem, u bah Lamphrang Blah kim pat patiaw eiei halor katei ka kam pynkhyllem EC lane ban wanrah ia ka jingiatynjuh bor ha ing dorbar.
Katkum ki khubor ba la iohlum, la iathuh ba kin don katto katne tylli ki mat ki ban pynkhluit ia ka ing dorbar, ha kaba kin don kumba saw tylli ki mat, ki ban wanrah da u bah Pyniaid S syiem, u bah Albinud Lyngdoh, bah Jansing Tynsong bad u bah Mansturdy Nongrem, bad nalor kitei ki motion la iathuh ba kin dang don ruh saki Cut Motion. Haba wad jingtip shaphang ki jingkylli kiba kumno ki ban wanrah ha ing Dorbar jong ka KHADC, la ioh jingtip ba kin don bun ki jingkylli kiba ia tyngkhuh bad ka kam iew kam hat, ki kam elaka/hima bad kiwei pat ki tnad bad ki tnad kiba kham kynjah ha katei ka dorbar kin long ka tnad kaba ia dei bad ka kam ain, ka kam khajna bad ka kam khaii pateng.