Shillong: U President jong ka Meghalaya EMRI Workers Union (MEMRIWU) u bah Roipar Kharrasswai, u la iathuh ba na ka liang ka MEMRIWU ki la shim ia ka rai ba naduh sngi nyngkong kin weng noh ia ka jingiakhih kaba jai jai da ka ba shah thngan.
Kat kum u nongialam ka MEMRIWU u bah Kharrasswai u la ong ba kane ka rai ban weng noh ia ka jingiakhih jong ki, ka long ba ki la iohi ba ka jingiakhih kaba jai jai katkum ki lynti kam shym la poi shaei shaei ruh ha kaba ka sorkar kam shym la shim khia ia kane ka kam ha kaba kam shym la lah ban khot ia ka jingialang ban ia kren halor ki mat jingdawa ka jong ki.
Naduh ba la sdang ka jingiakhih ki dkhot jong ka MEMRIWU kiba la poi sha Hospital kila long 14 ngut haduh mynta ka sngi. Ban pynsngew ia ka sorkar ha kaba ia dei bad ka jingdawa ka jong ki la sngi nyngkong hi kin sdang ia ka jingiakhih kaba tyngeh bad ka sorkar kam dei ban kynnoh ia ki.
Halor ka jingong u myntri ka koit ka khiah ba ka sorkar kam lah ban shimti ia ka Emergency Cell, u bah Roipar u la ong ba kaei ka jingeh ia ka sorkar ba kam lah namar 100% la bei pisa da ka sorkar, 905 da ka sorkar jylla bad 10% da ka sorkar pdeng, ki tiar ki tar ki la biang ki briew ki don kaei kaei ka jingeh ia ka sorkar.
U la ong ruh ba ka jingai por hynniew sngi ba kin bteng biang ia ka kam ka la kut mynnin ka sngi Thohdieng, lada ki bor ba pyniaid ki leh da ka bor, ki ruh kin leit sha iing bishar namar ki la pynkhein ia shibun ki kyndon da ki bor pyniaid, la kam u president ka MEMRIWU.
Phi don ban ong eiei?