Shillong: Ka sorkar jylla ka la rai ban pynpoi ia ki marbam sha man ki shnong na ka bynta ban ailad ia ki paidbah ban ioh ban thied ia ki bad ia kane, la aiti ha ki bor synshar district ban pynbeit ia ka por ha kine ki 21 sngi ban wan ha kaba ka ri baroh kawei kan khang kdam ban iakhun pyrshah ia ka jingpang Coronavirus.
Ka jingialang ka kynhun myntri mynta ka sngi, ka la rai ba ki paidbah kim dei ban khuslai, namar ba ka sorkar ka la pynbiang ia ki marbam na ka bynta u bnai Lber bad Iaiong bad ka la dep pan shuh ia ka bhah jong u bnai Jymmang bad Jylliew.
Ka jingkhang kdam baroh ha kawei ka ri, kan kut ha ka 14 tarik u Iaiong ban wan, kaban long 21 sngi naduh ba la pynbna da u Myntri Rangbahduh ka ri u Narendra Modi hynnin ka miet.
“Ngi la iashong ia ka cabinet mynta ka sngi, ha kaba la iakren ia ki marbam mardih bad ngi la rai ba ia ki marbam ba la sam da ka PDS kan iaid kumba ju iaid bad u khaw na bynta u bnai Lber bad Iaiong ka PDS kan iaid beit ban sam bad la pan shuh ia u bnai Jymmang bad Jylliew”, la ong u symbud myntri rangbah u bah Prestone Tynsong haba kren sha ki lad pathai khubor mynta ka sngi hadien ba la wai ka jingialang kaba long ha iing sah u myntri rangbah u Conrad K Sangma ha Polo Hills, Shillong.
U bah Prestone u la ong ba kito ki paidbah ki bym bam khaw baduk ne NFSA, kiba hap thied na iew, ka sorkar kan thied na kiwei ki jylla ban wanrah khaw nabar sha iew khnang ba kin ioh ban thied. U la ong ba ki don 23 tylli kyrteng ki marbam ba kongsan kum u khaw, umphniang, mluh, shini bad kiwei.
“Naduh lashai shi sngi ha ki jaka sor, ngin pynpoi sha ki shnong ha kaba ki dukan shnong kin die lyngba ka bor synshar district ryngkat ka jingiatreilang bad ka bor shnong, kin pynbeit ia ka por ban plie ban pyntip ba ki paidbah kin wan ban thied ha kine ki 21 sngi ban wan”, la ong u bah Prestone.
U la ong ba ia kane ka kam la aiti ha ki Deputy Commisioner ban pynbeit ia ka por, ban plie ban khang ia ki dukan ban pynduna ia ka jingwan tur ki paidbah, ban iada ia ka jingpang.
“Ha ki jaka nongkyndong, ka Food and Civil Supply kin pynbeit ia kane bad ia kane la aiti haki Deputy Commissioner ban sam ia ka jingtip sha ki paidbah bad sha ki lad pathai khubor”, la ong u symbud myntri rangbah. Ha kajuh ka por, u la ong ba na ka bynta ka jingkhang kdam ne lockdown , ka sorkar ka kyrpad ia ki paidbah ban iashim khia ban iashong khop ha iing. “Nga kyrpad rit ia ki seng niam, seng bhalang, ki nongsynshar shnong ban iatreilang halor kane ban pynthikna ba ki paidbah kin long shngain ban lait na kane ka jingpang”, la ong u bah Prestone.
U symbud myntri rangbah u la ong ruh ba ki mar kum ki jhur ban die sha iew na jaka nongkyndong, lada long la ai jingmut ba kin wanrah ha kajuh ka jaka ban die online lyngba ka jingiatreilang bad ki nongkhaïi ne nongthied.
“Ngin leh lada lah, ban leh da ka online delivery (thied da kaba shu leh da ka kor internet), home delivery (wanrah ha ïing). Kan long ka jingmyntoi ba lada don ki nongrep ne ki kynhun kiba leh ia kane ka kam, ba kin pynpoi ha jaka ba ialum lang ban die pat da ka online delivery”, u la bynrap.
Phi don ban ong eiei?