“Yn wad jingtip ia ki nongialap TUR”

Shillong,10 Nohprah:
U Myntri Rangbah ka jylla u Dr.Mukul Sang ma u la ong ba shuwa ban shim ia ka sien jam ban leh eiei, halor ka jingialap kaba ka kynhun Thma U Rangli (TUR), ka la pyn long ha Khyndailad ban pyrshah ia ka ain MPDA bad MMPO, ka sorkar kan wad bniah shuwa ia ki jingtip ban tip la katei ka seng kaba la ialap ha Khyndailad ka don ka jingthmu ban pynsngewthuh bakla ia ki paidbah ne ka dei ka jingthmu ban pynhuri hura, ne ka dei tang ka jingduna ka jingtip jong ki.
U Dr.Mukul u la ong ba lada ka tei ka jingialap jong ki ka don ka jingthmu ban wanrah ia ka jingpynsngewthuh bakla ia ki paidbah yn shim ia katei ka kam kaba ki leh kum ka kam runar. “Lada ka dei ba ki don ka jingthmu ban wanrah ia ka jingpynsngewthuh bakla yn shim ba ka dei ka kam runar” ong u Myntri Rangbah ka jylla u Dr.Mukul Sangma.
Lah ban kdew ba ka TUR hapoh ka jingialam ka kong Angela ryngad ka la pynlong ia ka jingialap paidbah ha Khyndailad ban pyrshah ia ka MPDA bada MMPO da kaba kynnoh ba katei ka ain ka dei tang ka ain iak jakor. Ia katei ka jingialap ki la pynlong hynnin ka sngi.
Haba pynshai ia ka jingshah kynnoh ai iak jakor ka MPDA bad MMPO u Dr.Mukul u la ong ba ka MPDA kam dei ka ain kaba la thaw da kane ka sorkar kaba mynta, hynrei ka ei kaba ka sorkar ka la leh ka dei tang ka ki jingpynkylla ban kyntiew shuh shuh ia ka ain kumba ka long.Halor ki jingkynnoh ba ka MMPO ka dei kaba la leh tang da ki kynhun Myntri u Dr.Mukul u la pynshai ba kano kano ka ain kam wan ha ka bor khlem da Pass na Ing dorbar thaw-ain ka jylla.