Hadien ba la jia ka jingjia kaba sngewtriem ha ka miet 16 tarik mynta u bnai ha kaba lai ngut ki la shah bom iap ha u paidbah ha Shnong Smit na ka daw ka jingiakynnoh Men-shohnoh, katei ka shnong ka la lum ia ka Dorbar Pyllun shynrang bad kyn thei ban ia sei la ki nia ki jutang ha kaba ia dei bad katei ka jingjia.
Shi bynta na ka jingiakren ha katei ka Dorbar , la ia kren ia ka jingjulor jong ki kali kiba la pynieng ha Stand Smit ha kaba ka jingjulor ka la poi da ki phew lak tyngka. Ka Dorbar ka la pynrem jur ia katei ka ka jingleh ki pulit kiba la shu bom pathar ia ki kali kiba pynieng ha iew Smit. Ka Dorbar ka la shim ia ka rai ban ujor syndon sha ka Myntri ka kam pohing ka jylla kong Roshan Warjri ia katei ka jingpynduh pyn-um jong ki pulit ia ki kali bad kumjuh ka jingbom bad shoh pathar ia ki paidbah.
Shuh shuh shuwa ban shim rai halor ka jingiap jong ki lai ngut, ka shnong ka la pynlong ka jingiatai kaba jrong ha kaba bun na ki nongkren kiba la ai jingkren, ki la ban jur ba ka rukom thmu pyniap jong ki runar ia u Lambha Nongrum ka long ha ka juh ka rukom kumba ki la leh ia kiba la shah pyniap ha ki snem kiba la leit ha kaba ki runar ki la law lyngkhuit bad bret ia u. Hynrei watla ka la don ka jingpynbor na ki paidbah ban shim noh ia ka rai ban pynshitom ia ka ing jong kitei ki lai-ngut kumba la phla u Lambha (24) snem ha kiba haing jong u, ia u Pasan jong u. Ki nongialam shnong ki dang lah pat ban pyn jai jai ia u paidbah ban iai ap haduh ba uta u samla ba la lait im un phla ha ki nongialam shnong bad hadien kata kashnong kan sa leh ia kaba donkam.
Ha katei ka Dorbar pyllun jong ka shnong Smit la wan ban ia shim bynta da ki samla, khynnah, kynthei bad ki rangbah kaba la pyndap mam ia ka madan Syiem. Baroh ki dukan ki la khang dam lut ha katei ka kynta jingialang.La ia donlang ruh u Bah Lambor Malngiang ,MDC Nongkrem, Martin M Danggo, MLA Ranikor , U Syiem Balajied Sing Syiem bad kiwei.
Phi don ban ong eiei?