Yn ujor PIL ka EKHLTWA, lada ym ioh jaka ieng taksi

Shillong, 24 Jylliew:
Namar ka jingbym don jaka ieng kali ha ka nongbah, ki nongkamai taksi hapoh ka lama ka East Khasi Hills Local Taxi Welfare Association (EKHLTWA) ka la dawa na ka sorkar ba kan ai jaka ieng noh ia ki namar ba kumba ka long mynta ki long tang kum ki sim ba her khlem dieng ban dem.
Haba kren mynta ka sngi, sha ki nongthoh khubor, u   General Secretary  ka EKHLTWA, u Bah Wandonbok Jyrwa u la ong ba ki la dep aiti ia ka dorkhas sha ka sorkar lyngba ka Meghalaya through Transport Department ban leh ia kaba donkam halor kane ban ai jaka ieng ia ki taksi kamai ha ka nongbah.
“Ka seng ka kwah ban buh ia ka jingtyrwa ba ka sorkar kan ai jaka ieng ia ki taksi khnang ba ki nongshong kin suk ban wad taksi shano ban leit namar ba kumba ka long mynta la shu iaid mareh khlem ioh jaka shong ne jaka ap nongleit nongwan”  la ong ka dorkhas ka seng .
Ka la byrngem ba kan leit ujor da ka PIL sha ka Kashari lada ka sorkar kam lah ban ai jaka ieng. “Ngin leit beit ban ujor da ka PIL sha ka Kashari lada ka sorksr kam lah ban ai jaka ieng”, la ong u Bah  Disparsing Rani, u Adviser ka EKHLTWA.
Ka EKHLTWA ka la kdew ba ki jaka ba dei ban ai jaka ieng ki dei kum ha Motphran,  Iew Mawlong, Bimola Point,  Them motor, Khyndai Lad, ha ophis u Deputy Commissioner, Karikhana Point, Rilbong Point, Anjalee Pump,  Civil Hospital Point, IGP point bad ha Barik Point,  Polo Point,  Robert Hospital, Jhalupara Point, Umsohsun Point, D.I Office Point Motphran.
Ha kajuh ka por u Bah Jyrwa u la buh jingkylli ia ka sorkar ka bym leh eiei ban shna ia ki jaka ieng kali kiba biang ha Them Metor namar ba ka dei ka jaka jong ka sorkar.
“Ngi dawa ba ka sorkar ka dei ban shim khia ia kane ka kam bad ban shna ia ka jaka ieng kali ha Them Metor”, la ong u Bah Jyrwa bad bynrap ba la dep phah ruh ia ka kopi sha u   Registrar General ka High Court Meghalaya khnang ba kan tuklar ia kane ka kam.
U la ong ba ka nongbah Shillong kan khuid kan suba lada don ki jaka ieng ia ki taksi, bad ki painkhana ha kaba ki nongleit nongwan kin nym leh pathar shuh.