Yn ujor ia ka jingthmu pynkylla 6th Schedule

Shillong, 21 Naiwieng:
Ka jingialang jong ka kynhun monsngewbha mynta ka sngi la rai ban phah ia ka shithi sha u myntri kam pohiing ka ri ban pynpaw pyrshah ia ka jingthmu ka sorkar pdeng ban pynkylla ia ka 6th Scheduled ka riti synshar ka ri kaba thmu ban khynra ia ka riti dustur ka synshar khadar kane ka ri Khasi.
Ha ka jingialang kaba la wan iashim bynta da ki riewpawkhmat bad ki riew rangbah, la iakren sani bha ia ka jingktah lada ailad ban wanrah ia ka jingkylla ia ka 6th Scheduled ha kane ka jylla.
Hadien ba la iakren, la shim ia ka rai ban phah ia ka jingujor pyrshah ia u myntri ka tnad kam pohiing ka ri u Sushil Kumar Shinde ba ka sorkar India kam dei ban pynkylla ban pynrit ia ka bor jong ka 6th Scheduled, hynrei ka dei ban pynkhlain shuh shuh ia ka synshar khaddar kaba don ha kane ka rilum Khasi.
Ka jingialang ka la rai ruh ban phah shithi sha u MP Bah Vincent H Pala, u Myntri Rangbah ka jylla Mukul Sangma, u myntri ka tnad District Council Affairs Bah HDR Lyngdoh halor kane.
Ki nongkren haba iashim bynta ha kane ka jingialang, ki la ong ba ka long kaba lyngngoh kumno ka sorkar pdeng ka kwah ban pynkylla ia kane ka 6th Scheduled haba ki trai jaka na kane ka jylla kim kwah ba kan pynkylla.
“Ka jingthmu ka sorkar pdeng ban pynkylla ia ka 6th Scheduled, ka don ei ei ha lyndet ban pyniap syndon ia ka riti dustur jong ka jaitbynriew”, la pynpaw bun ki nongkren ha kane ka jingialang.
Nalor ki rangbah shnong, ki nongialam sengbhalang, ki khlieh nongsynshar, la wan ban sakhi ha kane ka jingialang da ka jingkren na ki MDC kynthup Bah Adelbert Nongrum, Bah James Ban Basaiawmoit.
Katkum ka jingiathuh u Bah Ban, ka KHADC ka la dep pyrshah ia kane ka jingthmu ban pynkylla ia ka 6th Scheduled da ka sorkar pdeng da kaba thmu ban wanrah da ka Village Council ha jaka ki dorbar shnong. U la ong ba ka KHADC ka la phah ia ka jingtyrwa sha ka sorkar jylla ba dei ban pynkhlain shuh shuh ia ki dorbar shnong ki riti dustur jong kane ka ri Khasi ym ban pynduh pyndam. Ym tang kata, la ai jingmut ba ka dei ban pynduh noh ia ka Para 12 (a) namar ba kane ka kyndon ka la pyntlot bor ia ka district council ha kane ka jylla.
Ka jingialang ka la jied ruh lai ngut ki dkhot ban plan ia ka shithi ban phah sha ka sorkar pdeng ba kynthup Bah SS Rynjah, Bah Morningstar Sumer, bad Bah B Mukhim. Ia ka jingialang la pyniaid da u Dr I Nongbri ba la don lang bah W Anthony, bad kiwei.