Shillong, 9 Nohprah:
Ha ka 30 tarik u naiwieng ki ar seng bhalang na ri Lum Jaintia, ka HANM Jaintia Hills bad ka Jaintia National Council (East bad West Jaintia) ki la pynlong da ka jingiaid proseshon na madan Malki sha Addll. Secretariat, bad katei ka proseshon jong ki ka dei halor ka jingjia shah siat iap ki ar ngut ha u snem ba la dep ha Mookhep. Ha katei ka sngi ha ka jing ialang lyngkot kaba la long ha Parking Lot ka Addl. Secretariat ki nongialam jong kitei ki ar seng ki la ai por 10 sngi ia ka sorkar ba kan sei madan ia ka kaiphod halor ka jingshah siat iap ki ar ngut ha Mookhep ha ka por ka jingiakhih dewiong.Katei ka 10 sngi ba kitei ki ar seng ki la ai por ia ka sorkar kan kut noh lashai ka sngi ka 10 tarik u nohprah, hynrei haduh ba thoh ia kane ka khubor ka sorkar kam shym la patiaw eiei ia ka jingdawa jong ki. Haba ia kren bad u Rupang u President ka HANM na ri Lum Jaintia u ma Shaniah Suchen u la ong ba hadien ba ka sorkar kam shym la sngap ia ka jingdawa jong ki ki ar seng kin shong ia ka jingialang kyrkieh jong ki lashai hi ka sngi ka 10 tarik u nohprah.Ha katei ka jingialang u la ong ba yn shim ia ki rai ia khih kiba kham tyngeh ban pynbor ia ka sorkar ba ka dei ban sei madan noh ia ka kaiphod tohkit. Hadien ba ladep ban shim ia ka rai na katei ka jingialang u ma Shaniah u la ong ba ki ar seng kin ia kren bad baroh ki Rangbah Shnong ka East Jaintia ban ia snohkti lang ha ka jingiakhih jong ki bad hadien kata yn sa pynbna noh ia ka tarik jong ki jingiakhih.Haba ia kren bad utei u nongialam ka HANM la sngewthuh ba ka jingiakhih ba ki ar seng ki la buh hakhmat eh ka dei ka proseshon bah hangne ha nongbah Shillong bad katei ka proseshon ka dei beit ka jingleit tur sha Secretariat. Utei u nongialam ka HANM u la ong ruh ba lada ki seng bhalang kin ia khih tang hapoh ri Lum Jaintia ka sorkar kan ym iohi khmat hi ruh, hynrei lada tur sha Secretariat pat ka sorkar kan iohi kyndiang ba ki paidbah ka ri Lum Jaintia ki kwah ban ioh ia ka bishar hok.