Yn treikam pura ka deng lama iong ka KHADC mynta ka sngi?

Shillong, 28’lyngkot:
Ka Synjuk Ki Nong synshar Shnong ka Bri u Hynñiewtrep ki la pynbna paidbah ba kin pyrshah ia ka rai ka sorkar ban ym shah ia ki nongtrei sorkar ban bat kam Rangbah shnong lane ban long dkhot ha kano kano ka kynhun ne ki kynja seng. Ban pynpaw ia ka jingpyrshah katei ka Synjuk ka la jied ia ka 26 tarik u kyllalyngkot kaba dei ruh ka sngi ba ka India baroh kawei ka rakhe ia ka sngi Republic,bad ka jingiakhih ba ki la pynbna ka long ban tah jingthoh ha ki kynroh bad ka jingsoi kyrteng paidbah ha ki kynroh shnong.
Ha katei ka sngi la iohi ba katei ka tah kynroh bad ka soi kyrteng ki Rangbah Shnong ka la iaid tang ha ki katto katne tylli ki jaka kum ka Riatsamthiah, ka Mawpat, Wahingdoh, Jaiaw bad katto katne tylli ki shnong kiba hap ha sor Shillong. Hynrei la iohi ba kham pajih na sor Shillong ym shym la don kiwei pat ki shnong kiba la ia shim bynta ha katei ka tah kynroh, don katto katne tylli ki shnong kiba u nongthohkhubor u la iaid hynrei la iohi ba haduh ka por nohphai sngi ruh ym shym la don jingthoh kynroh lane kam shym la don kata ka jingsoi kyrteng, lait noh ki shnong kiba ha sor Shillong.
Haba pyrshang ban kylli na ki nongialam katei ka Synjuk ki la jubab ba ki ia katei ka kam ki la aiti ha la ki shnong ki shnong ba kin leh ia kaba donkam bad kim don jingkheiñ katno lak ne katno hajar kiba la ia shim bynta ha katei ka tah kynroh.
Hadien katei ka jingpynbna ka Synjuk sa ki MDC ka PDF kiba don ha KHADC ki la pynbna ba kin deng lama iong kum ka jingpyrshah ia katei ka rai ka sorkar bad kumjuh ruh ka hukum ba la High Court ka la pynmih ha ka 13 tarik mynta u bnai.Kham ha shuwa la pynbna ba ki MDC kin mih lymbung ha phyllaw jong ka KHADC hynrei la pynkylla noh da kaba la bthah ia baroh ban ia shim bynta ha ki jaka ba ki don kaba u Chief Executive Member ka KHADC u bah Pynshngaiñ N Syiem u la kyntu ia ki paidbah ban ia shim bynta da kaba deng lama iong ha ki jaka trei jong ki, ha ki jaka long iew, ne ha ki kali bad ha ki shnong ki thaw jong ki. Katei ka jingpynbna deng lama iong ka KHADC kan dei lashia ka sngi ka 29 tarik mynta u bnai, Hato la katei ka jingdeng lama iong ba la pynbna da ka KHADC kan treikam ha kylleng ki jaka ne kan treikam tang hapoh ki kamra trei jong katei ka ophis?.