Yn treikam biang ka Bethany Hospital Outreach Nongpoh ha ryngkat ki kyndon

Nongpoh:Hadien ba la iohbor na ka sorkar jylla bad ruh hadien ba la dep ban katkum ki kyndon bala bthah da ka sorkar, ki bor pyniaid ka Bethany Hospital Outreach Nongpoh, ki la plie noh mynta ka sngi, kata hadien 1 bnai tam ba ki la khangdam naduh ba la khlad noh u Dr. John Sailo Ryntathiang (Bam kwai ha dwar u Blei), uba la ngat ia ka jingpang khlam COVID-19, u Doctor ba Rangbah ha ka jylla bad uba dei ruh u trai katei ka Hospital.

Ia katei ka Hospital kaba la plie myn hynnin ka sngi, kan treikam ha ryngkat ki kyndon bad katkum ka jingiathuh u Dr. CM Pohshna Deputy Medical Superintendent katei ka jaka sumar, u la ong ba katei ka Hospital kan plie naduh ka por 9 baje haduh 3 baje janmiet bad kumba ka long mynta kam pat treikam lut baroh, hynrei kan kan leh shwa tang ia ki katto katne ki jingsumar, kiba kynthup ia ki jaka test, ki jingai dawai, ki jingsumar ba kyrkieh (Emergency), ka jingsumar bad ai dawai khyllung (Paediatric), namar kumba ka long mynta wat ki nongtrei kiba kynthup ia ki Doctor bad Nurse kim pat wan ban bteng ia ki kamram.

U la ong ruh ba ynda la biang ki Doctor, ki Nurse yn sa shnong pyrkhat biang, na ka bynta ban ai ka jingshakri ia ki paidbah bad ruh yn sa plie lut ia baroh ki jaka treikam kumba ju long ha ki por ba la dep.

Kiba la donlang ha ka jingsdang ban plie biang ia katei ka jaka sumar, ki kynthup ia u Bah Mayral Born Syiem MLA ka Nongpoh, u Bah Balajied Ranee MDC, ka Kong RM Kurbah Deputy Commissioner ka Ri-Bhoi District, nangta ki bor pyniaid ka Bethany kiba kynthup ia u David Sailo Ryntathiang Chief Financial Officer, Peter Sailo Ryntathiang CEO, Dr. CM Pohshna ryngkat kiwei kiwei ki riew rangbah, ki Doctor, ki Nurse bad ki nongtrei katei ka Hospital.
Na kiba la ai jingkren ha katei ka sngi, naduh u Bah Mayral Born Syiem, ka Kong RM Kurbah lem bad kiwei, kiba la pynpaw ka jingsngewsih halor ka jingjia ia u Dr, John Sailo Ryntathiang, uba la khlad noh hadien ba u la ioh ia u khning jingpang COVID-19 tad haduh ba un da khlad na pyrthei.
Ha kawei pat ka liang, kitei ki nongialam ki la ai mynsiem ia kitei ki nongtrei bad ki bor pyniaid katei ka Hospital ba kim dei ban duh mynsiem ba kane ka jingwan ka jingpang khlam COVID-19 kan long ruh kum ka jinghikai bad ka jingsneng ha kiba bun ki liang.