Shillong:Ka Asha Lakra ka National Secretary bad mayor jong ka Ranchi, ka iathuh ba na ka liang ka sorkar pdeng kan sa tohkit bad tian bishar ia kano kano ka jylla kaba khlem lah ban pyntrei kam bha ia ki skim pynroi kiba wan na ka sorkar pdeng.
Kum shi bynta ban rakhe ia ka jingdap 8 snem ka jingsynshar ka sorkar NDA ka National Secretary and Mayor jong ka Ranchi ka Asha Lakra, mynhynnin ka sngi, ka la wan ban iuh kjat ha Nongbah Shillong.
Haba ia kren bad ki lad pathai khubor, na ka liang ka Lakra, ka la iathuh ba hapoh ka jingsynshar ka Sorkar NDA, ka Ri ka la ioh shibun ki kam pynroi bad na ka bynta ka jylla Meghalaya u Myntri rangbah duh ka Ri u Narendra Modi , u la mang kyrpang ia ki skim kynthup ban wanrah ia ka Cancer Hospital ka Skim JJM, ka PM Care bad kiwei kiwei.
Haba kylli halor ka jingpynbna halor ka jingkular ban yn ioh kam ia ki 10 lak ngut ki samla ka Asha ka la ong “Haba don u Modi kane kan urlong bad kane ka dei ka jingiohi jngai jong u Myntri rangbah duh ka Ri bad u la ailad ia ki nong seng kam na kylleng ka pyrthei ba kin wan seng kam ha ka Ri, khnang ba ka Ri kan pahuh ha ka kam ka jam”.
Haba kylli halor ka jingkiewdor ka petrol, ka diesel bad ka LPG gas ka la ong “Ym tang ha Ri India ba don ka jingkiew dor ia kine, hynrei ha baroh kawei ka pyrthei ka don ka jingkiew dor, hynrei lyngba ka jingtrei shitom u Myntrirangbah duh ka Ri,u la lah ban tehlakam ia ka dor la ka dei ha ka petrol lane disel bad ha kaba ia dei bad ka LPG gas u la pynhiar dor 200 tyngka”.
Ka la ong ruh halor ka jingshah shitom ki longkmie na ka daw ka jingkiewdor ka LPG gas, na ka liang jong ka, kan leit ban rah ha khmat u Myntri rangbah duh ka Ri, khnang ban lah ban iarap ia ki nong Shillong.
Haba kylli halor ka jingmih ka jingkynnoh ia ka jingbym pyntrei hok ia ki skim kiba wan na ka sorkar pdeng ka la ong “U Modi ju peitngor ia baroh ki jylla halor ka jingpyntreikam ia ki skim ba wan na ka sorkar pdeng bad dei na kane ka daw ba u ju ong ba ngan ym bam bad ngan ym shah bam”.
“Ki don ki skim kiba na ka bynta kiba duk, ban pynpoi ia kane ka pisa sha ki,u myntri rangbah u la ailad ban plie ia ka zero account ban pynpoi ia kane ka pisa sha ki nongioh jingmyntoi lyngba ka Janth dhan Yojana”ka la bynrap.
Ka la ong ruh “Ha kaba ia dei ha ka jingpeitngor ia ki skim ki ba heh kiba wan na ka sorkar pdeng na ka liang u Modi, u peitngor bha bad ia kito ki jylla kiba khlem pyntrei hok ia kine ki skim yn sa tohkit bad yn sa pynshitom”.
“Dang ha kine ki khyndiat sngi, u myntri jong ka sorkar pdeng u la wan ha Meghalaya bad kynduh ruh ia ki nongialam sorkar bad ia kren ban pynthikna ba ki skim ki ba wan na ka sorkar pdeng, ki dei ban poi beit tang na ka bynta ki paidbah, kum ka Smart city ha ka jylla ki la ioh ia ki surok bad hangne ruh ngin shim ia ka rai jong ki briew bad ngin sa pyniaid ia ka jingtohkit halor ki jingpyntrei kam ia kine ki skim kumba leh ha Ranchi”ka la bynrap.
Phi don ban ong eiei?