“Yn tih bniah ka sorkar, ba kam kyrshan ka HNLC ia ka KSU”

Shillong, 14 Jylliew:
Ka sorkar jylla kan sa ngam jylliew bha halor ka jingkam ka seng lehnoh HNLC ban kyrshan iaka jingiakhih pyrshah ka KSU ia ka jingshna ia ka lynti, la ong u Myntri Rangbah ka jylla bad u la bynrap ba ki lad ban pyrkhing ia ka jingwan rung ki briew na ka lynti rel, ka donkam sa kawei pat ka bynta ban pynkhreh.
U Dr Mukul Sangma u la ong ba ka bor pulit ka sorkar jylla kin hap ban ngam kham jylliew halor kane ka kam ban wad ia ka jingshisha.
“Ki pulit ki la tip ban leh ia kaba donkam ban ngam jylliew halor kane ban wad ia kaei kaba la jia”, la ong u Myntri Rangbah ha kaba iadei bad ka jingtyrwa iarap ka HNLC halor ka jingiakhih pyrshah ia ka lynti.
U la ong ba ka State Security Commission ka la iakren halor kane, ha kaba ka jylla ka donkam ban pynkhlain halor kane ka bynta ban pynthikna ba ki runar kin tieng ia ka ain. “Ka sorkar kan shim ia ki lad ki lynti ban pynthikna ba ki runar ne ki riew pynkhein ain, kin tieng ia ka ain”, u la ong.
Ha kajuh ka por, u la ong ba ki lad pyrkhing ia ka lynti rel ka dei kawei ka bynta ha kaba ka sorkar ka hap ban thaw lad halor kane. U la ong ba ka jaka rung bad ka jaka mih kaba la pynkhreh mynta ka dei ia ki surok hynrei ia ka lynti rel, ka donkam da kiwei ki lad.
“Ym tang ka jaka rung jaka mih, ka donkam kham iar ha kaba iadei bad ka lynti rel ban teh lakam ia ka lynti trel”, u la ong.
U la ong ba lehse ka jingiaid lynti ka lah ban kdup da ka jaka rung bad jaka mih hynrei ka donkam ki lad ki jingdonkam da kumwei ia ka lynti rel.
Hynrei halor kane ka donkam ia ka bor na ka iing dorbar thawain namar ba khlem ka bor ka iing dorbar ym lah ban iaid shakhmat. “Ngi donkam ia ka ain ka iing dorbar halor kane ka bynta namar ba khlem ka iing dorbar ngim lah ban leh. Ngi hap ban bud ia ki kyndon katkum ka ain”, u la ong.
Katkum ka jingong u Dr Mukul, ka Commission ka la iakren ruh ha kaba iadei kumno ban pynsted ia ka jingtohkit bad ka jingpynngat kam ia ki runar kiba donkti ha ki kam thombor ia ki khynnah ki kynthei ha ka jylla.
“Ka jingbishar kam dei ban slem ia ki kynthei, ki khynnah ba shah thombor”, la ong u Myntri Rangbah.