Yn thung da ka komishon ban die khaw T.3 shi kilo:Mukul “21lak ngut, yn myntoi ki nongshong shnong na u khaw tad dor”

Shillong, 24 Naitung:
Ban peit ia ka jinglar kam ka jingpyntreikam ia ka skhim aibam ia kiba duk ha ka jylla, ka Food Security Scheme (FSS) ha ka jylla, ka sorkar kan thaw da ka Commission. Kane ka FSS ka dei ka skhim jong ka sorkar pdeng.
U Myntri Rangbah ka jylla u Dr Mukul Sang ma u la iathuh mynta ka sngi, ba ka sorkar kan sa pyntreikam noh ia ka Food Security Commission (FSC) shaid shaid da kaba thung da ka Commission ban peit ia kane ka kam khnang ba kan long kaba larkam shisha sha ki paidbah ka jylla.
U la iathuh ba ka FSC, kan rai kumno ban pyntreikam ia ka FSS, ha ka jylla kan long kaba larkam katkum ki kyndon jong ka Food Security Ordinance kaba la mynjur da u President ka ri dang shen. Ha kane ka skhim aibam ia kiba duk ha ka dor tad, kumba 21 lak ngut ki nongshong shnong ka jylla kin sa ioh jingmyntoi kynthup ar lak ngut kiba duk ne BPL.
Katkum kane ka skhim ia u khaw yn ioh ha ka dor kaba tad kata T.3 kilo katba u kew bad kiwei ki jingbam yn ioh ha ka dor T.2 bad T.1 ha ka shi kilo.
Ka sorkar pdeng ka la rai ha u bnai ba la dep ban pynmih ia ka hukum ha kaba baroh kumba ar na ka lai bynta kin ioh 5 kilo u marbam man u bnai ha ka dor tad.
Ka food security programme kan sa ai jingmyntoi haduh T. 1, 25,000 klur man u snem ban ai bam tad dor ha kaba 62 million ton u khaw, u kew bad kiwei ki marbam yn sam sha ki 67 percent ki nongshong shnong ka ri.