Shillong: U myntri ba dei peit ia ka tnad pule puthi u Ma Lakmen Rymbui u la iathuh ba ha ka jingialang ba la pynlong mynta ka sngi ka Sorkar jylla ka la shim ia ka rai ban thoh sha ka University Grant Commission ban phah ban pynjlan ia ka Eksamin ka ban long na ka bynta ki khynnah ki ban ia leh ia ka Under Graduate bad ka Post Graduate.
U Ma Lakmen haba ia kren bad ki lad pathai khubor, u la ong ba ha ka 7 tarik u bnai Naitung 2020 ka UGC ka la pynmih ia ka jingbthah ban pynlong ia ka Exam na ka bynta ki Under Graduate bad ka Post Graduate ba ki dei ban pyndep hapoh ka 30 tarik u September 2020 bad halor kane; 4 tylli ki jylla ki la leit ban ujor ia ka ne ka rai sha ka Supreame Court, ha kaba ka Supreame Court ka la ai ia ka rai ba ka long kaba donkam ban pynlong ia ka eksamin, hynrei ka Supreme Court ka la ai ruh ia ka rai ba ia ka eksamin, lah ban pynjlan por khyndiat bad ban pynjlan ia kane ka Exam ki dei ban pan jingbit na ka UGC.
Halor kane ka bynta, na ka liang ka sorkar jylla ka la pynlong ia jingiatai sani ryngkat ki nongpyniaid jong ka North Eastern Hills University bad ia tai bha ha ka ba mynta ka sngi la shim ia ka rai ban thoh sha ka UGC ban pan jingbit ban pynjlan noh shuwa ia kane ki exam ha kane ka jylla bad na ka liang ka sorkar ki la ai jingmut ban pynjlan shuwa ia ka ne ka Exam haduh ka 7 tarik haduh ka 16 tarik u Risaw 2020 bad ia ka result yn pynbna noh hapoh ka 31 tarik u Risaw.
U Ma Rymbui u la iathuh ba ia ki exam na ka bynta ka Post Graduate baroh ki dei ban leh ia ki Exam lyngba online hynrei na ka bynta ka exam under Graduate ki khynnah ki lah ban ialeh ia ka exam lyngba ka online, hynrei na ka bynta kito ki khynnah kiba ym lah ban leh ia ka Exam online ki lah ban ialeh ia ka exam ha ki Exam Center jong ki.
U la iathuh ruh ba ka NEHU kan leh ia ka ba donkam ha ka ba iadei bad ka jingpynbiang ia ki jingkylli bad ban shim ia ki jubab na ka bynta ki khynnah ki ba kwah ban leh ia ka Exam online, u la ong ruh ba na ka bynta ki khynnah ki ba dei na rilum Garo ki bym kwah ban wan ban leh exam ha Shillong ki lah ban leh ha ki Exam Center kiba don ha Garo Hills District.
Na ka bynta ki khynnah ki ba sah shabar ka jylla ki ba hap ban leh ia ka Exam lyngba ka online. U Ma Lakmen u la iathuh ruh ba ki khynnah ba na shabar ka jylla ki ba hap ban leh ia ka ne ka Exam Post Graduate ki don kumba 700 ngut bad ki ban ialeh na ka bynta ka exam Under Graduate ki don kumba 3000 ngut bad baroh ki khynnah kiba hap ban leh ia ka under Graduate Exam ki don kumba 22,000 ngut bad 2,000 ngut ki ban ialeh ia ka exam Post Graduate.
Phi don ban ong eiei?