Yn thied bording, kumba thied top-up mobai

Shillong, 4 Rymphang:
Ka jingialang jong ka kynhun myntri mynta ka sngi ka la pdiang ia ka rukom pyndonkam ia ka bording da kaba siew pisa lypa, ne kumba thied top up ki mobai ha kaba ki nongpyndonkam ki lah ban thied ia ka bording katkum ka jinglah jongki bad hadien ba la lut ka balan, kin hap thied biang bad kane kan shong katkum ka jingpyndonkam jongki kumba thied top up mobai ban phun.
Kane ka rukom ka long kaba thymmai ha kaba mynshwa, ki nongpyndonkam bording ki thang ia ka bording bad hadien ba mih bnai, kin sa thew katno ka poi ka bill hynrei ha kane ka rukom thymmai, ki briew ki hap ban thied lypa ia ka bording kumba thied top-up mobai.
Haba kren sha ki nongthoh khubor hynne ka sngi hadien ba la wai ka jingialang, u Myntri Rangbah ka jylla u Mukul Sangma u la ong ba ka sorkar ka la pdiang ia kane ka rukom pyntreikam thymmai ka MeECL bad kan ai ia ka jingkyrshan pisa ia ka Meghalaya Power Distribution Corporation Limited (MPDCL) ban pynshlur ia ki paidbah ban pyndonkam da ki meter prepaid.
U la iathuh ba ka pisa la mang kyrpang na ka bynta kane ka prokram. U Mukul u la ong ba ka prokam kan pynthikna ba ki nongpyndonkam bording kin suk ban siew bad ban jied katkum ka jingpyndonkam jongki bad kim donkam shuh ban pynsah teng ia ka bai thang ding.
U la ong ba ka MPDCL ka la tyrwa ba ka sorkar ka dei ban pynbna ia kane sha baroh ki tnad sorkar ban thied bording noh da u meter ba long prepaid ha baroh ki tnad sorkar.
Ka sorkar jylla ka la ai jingmut ruh ia ka Meghalaya Energy Corporation Limited (MeECL) ban pynlong ia ka workshop ban pynthikna ba ki nongpyndonkam bording kin shim noh da kane ka lynti kaba thymmai.