Yn thiah surok, ki nongialam KSU, ha ka 25tarik Nailur, naba jot tasam ka NH-6

Shillong: Ka jingialang jong ka KSU EJHDU, kaba la long mynhynnin, ka 14tarik Nailur 2023, ka la shim ia ka sien jam kaba ar ban pynlong ka jingiakhih paidbah da kaba thiah hapdeng surok bah NH-6 ha Khliehriat kaba dei ka nongbah jong ka District East Jaiñtia Hills.

Ia kane ka jingiakhih yn pynlong ha ka 25tarik Nailur 2023, (Monday) naduh ka por 10:00baje mynstep haduh 04:00 janmiet. La shim ia kane ka rai hadien ba ka NHAI, kam shym la patiaw ne sngap ia ka jingdawa ka seng ha ka wat ba nyngkong jong ka jingiakhih ha khmat ka khyrdop lump isa, ha Lumshnong,ha ka 08tarik Nailar 2023. Ka jingiakhih ha kato ka sngi kaba la wan ia shim bynta, naduh ki rangbah shnong jong ka thaiñ elaka Narpuh lem bad ki paidbah ba bun. U Manager Technical jong ka NHAI u Biswa Jyoti Lahkar, u la kular ban pyndep ia ka jingmaramot ia u surok hapoh ka 6 taïew kaba mut, ban sdang naduh ka 09tarik Nailar 2023, hynrei kata ka 6 taïew ka la jan kut, hynrei ym don dak eiei. Dang ha kine ki khyndiat sngi, ka seng ka la hiar shaduh Ratachera ban jurip, la lap pynban ba u surok u nangjot nangjot rathai katba nangmih ki sngi, na ka jingkular kai kular thok jong ka NHAI.

Kumta ka seng ka khot ka wer ia ki paidbah nongshong shnong ka East Jaiñtia Hills District baroh kawei bad ia kiwei kiwei ki paralok sengbhalang, ban wan ban ia snoh kti lang ha katei ka jingiakhih ba jai jai da kaba ngin thiah hapdeng surok bah. Ka long shisha ka jinglehraiñ kaba khraw ia ka sorkar jylla ha khmat ki 4 tylli ki jylla ka thaiñ shatei lam mihngi kum ka Mizoram, Tripura, Manipur bad Assam, namar une u surok bah u dei uba pyniasoh bad kitei ki jylla.

Shuh shuh hadien ba la iohi ba ka NHAI bad sorkar jylla kim leh eiei halor ka jingsniew tasam u surok, ka seng kam banse ban shim sa kawei ka sienjam kata hadien ba la kut ka jingthiah surok ha katei ka sngi, ha katei ka juh ka tarik, la khot la wer lang ia baroh ki paradoh para snam ki nongshong shnong ka District bad kito ki jylla ba marjan, ban sangeh ka leit ka wan, ka kamai kajih, ki kali bad rit bad khraw naduh ka janmiet jong katei ka sngi bad tarik naduh ka por 07:00mynmiet haduh ka por 05:00baje mynstep bad kane kan bteng haduh 1 taïew lynter tang por mynmiet.