Nongstoiñ:U Myntri Rangbah ka Jylla u Conrad K Sangma ha ka 15 tarik u Naiwieng, ha shwa ba un wan sha ka jingialang ki nongrep hapoh Nongstoiñ u la leitkai pyngngad bad la ka kurim lem bad i khun jong u sha ka Dew lynnong Nongkhnum.
U Conrad u la pynbna ruh ba ka sorkar kan theh jingiarap na ka bynta ban nang kyntiew shuh shuh ia ki kam jngohkai pyrthei ha Nongkhnum, da kaba yn shna ia ki jaka sah kai bad ki jaka bam kiba biang ha katei ka Dewlynnong ia kaba yn pyniaid hi da ki paidbah.
Shuh shuh u Conrad u la iathuh ba ka sorkar Jylla ka la ioh jingiarap pisa haduh 700 klur na ka New Development Bank na ka bynta ban kyntiew ia ki kam jngohkai pyrthei ha ka Jylla bad na katei ka 700 klur 13 klur yn mang na ka bynta ka Dewlynnong Nongkhnum.
Hadien ba la shangkai pyngngad na ka Dewlynnong Nongkhnum, u Conrad u la wanphai sha Nongstoin lyngba ka surok khohruh khohram kaba dei ruh ka surok Nongstoin-Wahkaji bad u la pynlong syndon ban jurip ia kane ka surok kaba la sahteng lah da ki phew snem.
Halor katei ka surok Nongstoin-Wahkaji u Conrad u la ong ba ka sorkar ka la dep ban mang haduh 300 klur na ka bynta ban shna ia katei ka surok bad u la iakynduh ruh ia u Contractor ban pyntrei ia katei ka surok, u ba la pyntikna ruh ba shen ha kine ki khyndiat sngi yn sa iohi noh ia ka jingsdang ban pyntrei ia katei ka surok.
Ym tang katta u Conrad u la pyntip ruh ba ïa ka surok Nongstoin-Maweit ba la mang pisa lyngba ka World Bank ka sorkar ka la dep ban pynkhreh ia ka DPR bad la khmih lynti ba ha u bnai Rymphang jong u snem 2022 yn sa lah ban sdang ban pyntrei noh ia ka bynta kaba nyngkong jong ka surok Nongstoin-Maweit kaba 35 KM.
Nalor kitei ki kam pynroi u Conrad u la ong ba ki dang don shuh shibun ki kam pynroi ba dang donkam hapoh West Khasi Hills District bad ia kita ym lah ban leh shi sien leh, hynrei wat la kata ka sorkar MDA ka la thaw shibun ki lad ban wanrah ia ki kam pynroi la ka long ki lynti ki syngkien, ki um bam um dih, ha ka pule puthi bad kiwei kiwei.
Phi don ban ong eiei?