Yn thaw sorkar suk ka ZPM, ha Mizoram, rem U MR ha ka jingialeh

Aizawl: Ka seng sain pyrthei, ka Zoram People’s Movement (ZPM), ba la khlieh da u Lalduhoma, ka la jop suk ia ka elekshon MLA ha Mizoram, da kaba ka jop 27ngut ki dkhot, ha ka iing kaba 40ngut.

Ha ka jingniew vote, mynta ka sngi, ka seng synshar, ka Mizo National Front (MNF), ka la jop 9ngut bad ka la nang tam ha kawei ka Constituency. La iathuh ba U Zoramthanga, myntri rangbah ka Mizoram, ula shah rem, ha ka jingialeh, ha Aizawl East-I. U nongialam ka ZPM, U Lalduhoma, ula jop biang na Serchhip, da 2,982 vote. Ha katei ka elekson, ka BJP, ka jop 2ngut, ka Congress, ka jop 1.

Ki don 80 percent, ki nongthep vote, kiba shim bynta ha ka elekshon, kaba la pynlong ha ka 7tarik Naiwieng 2023. Ki nongthep vote, ki don 8.57lak ngut ha katei ka jylla.