Yn thaw ktem ki CRP ha New Shillong, ba ai ka sorkar ïa ka jaka ba shiphew acre

Shillong:Ka sorkar Jylla mynhynnin ka sngi palei, ka la aiti ïa ka shithi ai jaka ba 10 acre ha New Shillong Township (N ST), sha ki CRPF ba kin buh ia ka ktem ba shirta.

Ïa kane ka shithi ai jaka la aiti da u Myntri Rangbah ka Jylla Conrad Kongkal Sangma ha ka jing ïalang bad ki CRPF ba long hynnin ka sngi ha Secretariat.
U Myntri Rang bah ka Jylla Conrad K Sangma, haba pyllait khubor lyngba ka Video sha ki lad pathai khubor, ula ong ba ki CRPF kila kyrpad la bun snem ïa ka Sorkar Jylla ban ai jaka ban buh ïa ka ktem ba shirta jong ki.

“Namar ka jingbym don ïa ka ktem ba shirta, ki Battalion bad ki pyrton bapher bapher jong ki CRPF, ki la buh ïa ki ktem ba shipor ha kylleng ki jaka jong ka Nongbah bad ha Jylla, ka jingpynbeit kaba la pynjlan la slem bha,” ula ong.
“Mynta ngi la rai bad ngi la aiti ïa ka jaka ba 10 acre ha New Shillong Township mar syndah ka IIM ïa ki CRPF ba kin buh ïa ka ktem ba shirta hapoh ka Jylla Meghalaya,” ula bynrap.
U Myntri Rangbah u ong ba hadien ba la dep shna ïa kane ka ktem, ki CRPF kin sa pynkynriah noh ïa baroh ki ktem ba shipor sha kane ka jaka ba la ai shirta ïa ki.

“Ngi la ïakren ruh ïa ka jingpynkynriah noh ïa ki ktem na kylleng ki jaka kiba la mih ki jingdawa ban pynkynriah da ki paidbah ruh kum na Mawlai,” ong u Myntri Rangbah.
U Myntri Rangbah ula ong ba ka jingpynkynriah ïa ki ktem CRPF sha ka jaka ha New Shillong kan sa sdang shisien ba la shim rai bad ïoh jingmynjur na ka Ministry of Home Affairs ka Sorkar India ba kin shimti ïa ka jaka ba la ai da ka Sorkar Jylla.
U Myntri Rangbah u la pyntip ba ka jingïalang ka la ïakren ruh kumno ban pyndonkam ha ka rukom kaba biang eh ïa ki jaka ba don ki ktem ba shipor hadien ba la dep pyllait da ki CRPF.

U Myntri Rangbah u pyntip ba ka Sorkar Jylla ka don jingthmu ban buh ïa ka Skill bad Entrepreneurship Training Centre lane ka Arts & Culture Centre ha Mawlai hadien ba la pyllait ki CRPF ïa ka jaka.
“Ngi la ïoh ïa ka jingïalang ba seisoh bha bad ngi kyrmen ba shen kan sa wan noh ka jingai jingmynjur ka MHA ban shimti noh ki CRPF ïa ka jaka ba la aiti da ma ngi mynta ka sngi,” ong u Myntri Rangbah.