Shillong 24 Rymphang: U General Secretary ka National People Party (NPP) u bah Sniawbhalang Dhar u la pyntip ba hapoh ka Jaintia Hill Autonomous District Council (JHADC) ka National People Party (NPP) kan thaw ia ka Executive Committee (EC) ha ka jingtreilang ki 3 ngut ki MDC ka UDP bad 2 ngut ki kyrtong shimet ha kaba u bah Thombor Shiwat, un long Kum u Chief Executive Member (CEM ) ka JHADC.
Haba kren sha ki ladpathai khubor u bah Sniawbhalang Dhar u la ai khublei kyrpang ia ki paidbah ka Jaintia Hill kiba la ai ka jingkyrshan ba pura ia ka NPP haduh 13 Seat hapoh ka Jaintia Hill Autonomous District Council (JHADC) bad kdew ruh ba ka dei ka burom kaba khraw ia ka NPP ba kan jop haduh 13 ngut ki MDC ,bad kane ka pynpaw ia ka jingshaniah kaba skhem ia ka party .
” Hapoh JHADC Mynta ka NPP ka don 13 ngut ki MDC ha ryngkat ki 3 ngut MDC ka UDP bad 2 ngut ki MDC shimet ki ba kynthup ia ka Kong Violet Lyngdoh bad u bah Moonlight Pariat kiba la mynjur ban kyrshan ia ka EC ban ialam da ka NPP hapoh ka JHADC ” u la ong.
U bah Dhar u la iathuh ba mynta ka sngi ka la don ka jingialang baroh ki MDC ka NPP , UDP bad 2 ngut ki Kyrtong shimet kiba la long 18 ngut ki MDC ki ban thaw ia ka EC hapoh Jaintia Hill Autonomous District Council (JHADC) nalor kane ka Kong Violet Lyngdoh Mynta ka sngi hi ka la rung noh sha ka NPP .
” Da ka jingrung ka Kong Violet Lyngdoh sha ka NPP ka NPP , Mynta ka la don 14 ngut ki MDC hapoh JHADC, bad da ka jingiahun lang ngi la jied biang ia u bah Thombor Shiwat ba un long biang Kum u CEM ka JHADC ha ka sien ba lai ” u la ong.
Halor ka jing jop ka NPP tang 4 ngut ki MDC ha KHADC u bah Sniawbhalang Dhar u la ong ba ka party kan sa shong bishar bha ban wad ia ka daw ba ka NPP ka hiar ha Khasi Hill.
Halor ka jingkynnoh u President ka VPP ba ka jingioh ka VPP tang 8 ngut ki MDC na Jaintia Hill ka dei namar ka jingshah byrngem , u la ong ba lada ka NPP ka jop 13 da kaba thombor ha Khasi Hill ka VPP ka ioh 17 seat hato ka dei ba ki thombor? Ka Politic hi kam ju don Kum kata ki paidbah ki pyntreikam ia la ka Jong ka hok.
U bah Sniawbhalang Dhar u la ong ruh ba ka jingjop bun ka VPP ha Khasi Hill kam buh jingma ia ka NPP namar ba na ki 29 seat ba ka VPP ka ioh jingkyrshan ha ka MP election hynrei ha ka MDC ki ioh tang 17 constituency , ka don ka jinghiar kaba khraw ia ka VPP.
” Tang hapdeng 8 bnai ba ki jop ia ka MP election, na ka 29 constituency ki jop tang 17 constituency ha ka MDC election kane ka paw ba ka VPP ka la hiar bad kam buh jingma eiei ia ka NPP” u la ong .
Phi don ban ong eiei?