Shillong: Mynta ka sngi ka 7 tarik u Nailar 2020, ka jylla ka la duh noh ia uwei na ki nongialam ba khraw jong ka jylla, U Bah Hispreaching Son Shylla, 66 snem ka rta u la khlad noh mynta ka sngi ha Super Care Hospital Shillong, hadien ka jingshitom kaba la bat ia u, la katto katne por.
Khyndiat shaphang une u riewrangbah u bah Hispreaching Son Shylla u dei uwei na ki riewsainpyrthei uba la ih bha ha kane ka jylla. U la bat kum u Chief Executive Member jong ka Khasi Hills Autonomous District Council, u la long kum u MLA,u la bat ia ka kam minister ha ka sorkar jylla bad u la long ruh kum u Deputy Speaker. U la sdang kum u nongialam paidbah na ka jingialang paidbah kaba la long ha Madan Malki u la long u wei na ki nongsain dur ban thaw ia ka sorkar lai lama da kaba kynthup ia ka party APHLC, PDIC bad ka HSPDP ha ka ba u la wan rah ia u bah D.D Pugh kum u myntri rangbah ka jylla ha u snem 1978.
U bah Shylla u la iehnohkam (resign) noh ka kam sorkar kaba u trei ha ophis Accountant General.Kum u nongmih khmat paidbah ha ka sngi ka ba nyngkong u la jop kum u MLA na ka party Congress ha u snem 1988 bad ha ka sien ka ba ar u la jop biang kum u MLA ha u snem 1993 na ka seng APHLC (AM). Ha kane ka jinglong MLA u la ioh ban long kum u myntri jong ka sorkar bad u la bat ruh ia ka kam kum u Deputy Speaker. U bah Shylla u la jop nyngkong kum u MDC ha u snem 1984 na Nongkrem Constituency bad ha kane ka jinglong MDC u la ong kum u EM, ha u snem 2004 u la wan phai biang kum u MDC na Laitkroh constituency bad dei ha u snem 2005 haduh 2008 u la ioh bat kum u Chief Excutive Member jong ka Khasi Hills Autonomous District Council.
U bah Shylla u la wan phai biang kum u MDC ka dei na ka election jong ka MDC shiteng samoi ha u snem 2016 Nohprah na Nongkrem bad ha u snem 2018 u la ioh ban bat biang ia ka kam kum u Chief Excutive Member haduh ban da poi ka election thymmai.
Ka bynta ka ba khadduh ka ba u bah Shylla u la shakri na ka bynta ka im lang sahlang ka long ba u la seng ia ka Synjuk ki Rangbah kur kane ka long ban tehsong ia ki kur ki jait jong ki khasi khara, u la bat ruh kum u Chairman jong ka whatapp group ka Sur U paidbah u Hynniewtrep. Kane ka group ka la shakri shibun na ka bynta u paidbah khamtam ha kaba iadei bad ka khlam Covid-19.
Ka jingleit on tep ia U bah Shylla, kan long ha ka Sngi U Blei, 9tarik Nailar 2020, ha kaba yn tep ia u, ha Mawblei, ha ka por 1 baje nohsngi. U bah Shylla, ula iehnoh shadien ia ka kurim bad lai ngut ki khun.
Naka liang jong nga ruh u Bidingstar Pariong nga phah ka khubor sngewlem halor ka jing khlad noh u bah HS Shylla, u wei naki nong ïalam ba khraw ïaka jait bynriew Khasi jong ngi.
Hoid ngam pat ïa kynduh markhmat bad u hynrei nga shu ïoh haki khubor bad ki kam jong u, Sa leit suk leit saiñ bah Shylla bad to duwai lem maphi na sha lyndet ba ka Ri Khasi jong ngi kan don ha pdeng ka jing suk jing saiñ.