Shillong:Ka sorkar jylla ka la pynkhreh shaid shaid ban pynjlih bad ban shna ia ka surok kaba kynsai ka ban ngiam saw tylli ki kali ne ka 4-Lane ha baroh ka Sor Shillong Thymmai.
Katkum ka khubor, ka tnad pynroi sor ka la pynkhreh ban khot tender shen ban shna ia ka surok 4 Lane ha sor Shillong thymmai ha ka jingmang pisa ka bym duna ia ka 150 klur tyngka.
“La pynkhreh ban shna ia ka surok 4 Laning ha baroh ka sor Shillong Thymmai bad ka jing mang pisa kan long kumba T.150 klur”, la ong ka tyllong khubor.
La iathuh ba ka jingkhot tender kan sa plie shen bad la kumno kumno ha u bnai Jymmang ban wan.
Kane ka dei ka thong jong ka sorkar jylla ban pynsting noh ia ka sor Shillong barim, ha kaba kan sa rah ruh ia ki ophis sorkar sha ka sor thymmai, bad kane ka kam ka la iaid ter ter. Ka sorkar jylla ka la pynkhreh ruh ban tei thymmai noh ia ka Secretariat sha Mawdiangdiang.
La iathuh ba ka sorkar ka la pynkhreh shaid shaid mynta ban khot tender ban shna ia ka secretariat ha sor Shillong thymmai bad ka la buh thong ban pyndep nadong shading hapoh kane ka san snem ban wan.
Lah ban kdew ba u myntri rangbah u Conrad K Sangma kham mynshwa, ula ong ba hadien ba la rah ia ka Secretariat sha Sor Shillong Thymmai, ka jingdheng kali ha ka nongbah barim kan sa rngad noh, bad khamtam hadien ba la rah ia ki ophis sorkar kiba kham heh sha katei ka jaka thymmai.
Mano phi tharai ban jop ia kane ka tender lada baroh phi lah sngewthuh?