Shillong:U myntri ka tnad bording ka jylla u Abu Tehel Mondal, mynhynnin ka sngi u la ong ba ka tnad sam bording ka jylla ka MeECL, kan sa sop noh ia ki waiar ha ki jaka ba jur ka jingtuh ding, khnang ban khang lad ia ki nongtuh bad ban lait na ka jingduh nong ka tnad.
Haba kren myn ta ka sngi, u Mondal u la ong ba ka don ka jingthmu ban pyntrei kam da Aerial Bundle cable ne ban sop noh ia ki waiar ba pyniaid ding.
“Ha kito ki jaka ba jur ka jingtuh ding, ngi la thmu ban pyntreikam noh da ka AB ne Aerial Bundle Cable da kaba shu sop noh ia ki waiar”, la ong u Mondal.
U la ong ba ka don ka jingthmu ban pyntreikam da u meter ban khein ia ki jingpyndonkam bording ban lait na ka jinglut ksan ka bording.
Ha kawei ka liang, u la ong ba kito ki kompeni ba pynieng tower lada kim siew ia ka bai ding, yn shu ot noh shi syndon. Hynrei kawei ka jingeh ka sorkar, ka long ba lada ot noh ia ka jingsam bording ia ki mobile tower, kan buh jingeh ia ki paidbah kiba pyndonkam mobile.
Ha kajuh ka por, u la ong ba ka jinglong jingman ka bording, ka biang mynta bad ka la rai ban pynduna ia ka jingpynlip bording tang 2 kynta ha ka nongbah katba sha kiwei ki jaka kan long 3 kynta, wat la ki don kiba lip kham bun kynta namar ba don ka jingshna ia ki jingsniew.
Phi don ban ong eiei?