Yn slem ka surok Shillong- Tura bym ioh jaka ha Mairang

Shillong, 17 Nailur:
Ka jingpyndep ia ka surokbah na Shillong sha Nongstoin bad ban poi sha Tura kan slem namar ba ka la don ka jingeh ban ioh jaka ha ka bynta jong ka Mairang bad ha thain Hynniewmer.
Ha ka jingshisha, la buh ban pyndep ia kane ka surok ha u Lber 2014 hynrei la sngewthuh ba ym pat lah ban pyndep ha kane ka por ba la buh namar ka jingkyllain ban ioh jaka. U heh sorkar ha kane ka sngi Hatmajai, u la iathuh ba dang ap ia ka jaka ban ai ha ka thain Mairang, Hynniew Mer (Upper Shillong) bad ha ki bynta ka East Garo Hills. “Ka jingslem ban ioh ia ka jaka ha Mairang ka dei ka jingslem ban siew ia ka pisa sha ki trai jaka. Ngi kyrmen ba ka sorkar kan pynlait noh ia ka pisa ban siew noh sha ki trai jaka kloi katba lah” la ong u heh sorkar. Ha kaba iadei bad ka jaka ha ka thain Hynniewmer, u la ong ba ka jingiakren bad ka trai jaka ka Forest and Environment ka dang iaid shaid shaid.
“Ngi kyrmen ba ka tnad Forest and Environment kan pynkloi ia kane ka kam katba lah ban aiti sha ka PWD,” u la ong. U la ong ba la don ka jingkyllain ban ioh jaka ha bynta jong ka East Garo Hills.
“Ngi lah ban sdang ia ka jingshna ia ka surok mar mar hadien ba la ioh ia ka jaka” u la ong shuh shuh bad bynrap ba ka rukom pyntrei ia kane ka surok ka long kaba hun haduh mynta namar ba ka kompeni ka trei sted bha. Ia kane ka surok kaba jngai 264.30 kilometer na Shillong-Nongstoin-Tura la mang ha ka jinglut kaba T.1494 klur ha u Rymphang, 2011 bad ka por ban pyndep kan long ha u Lber, 2014. Hadien ba la dep ia kane ka surok, kan long ka jingsting ia ki briew ban leit ban wan na Shillong sha Tura ban lait iaid na jylla Assam. Ia kane ka surok Shillong-Nongstoin-Tura Highway la pynbna kum ka National Highway ha u snem 2004.