Shillong, 12 Nailar:
U Bah Leston Wanswett u la rai mynta ka kynti ban shongthait shuwa na ka elekshon MDC kaba u la ju ia khun na ka Shella Konstitwensi. U Bah Leston Wanswett u dei u nongialam jongka seng Congress ha Shella Konstitwensi la bun bun snem hynrei utei u rang bah u la mih noh na katei ka seng ha shuwa ka elekshon MLA kaba la dep namar ka jingshah pynduh tiket ha a seng Congress kaba la ai sha u Bah JropSingNongkhlaw, bad kham hadien utei u rangbah haiden ba la ia kren sngewthuh jingmut bad ka seng Congress u la pyniasoh biang ia lade sha ka longing longsem jong ka Congress ha ka politik.
Haba ia kren bad u Bah Leston la sngewthuh ba utei u rangbah u la rai ha lade ban shongthait noh ha kane ka elekshon MDc ka ban sa long shen watla ka la don a jingpynbor na ki paidbah ba un ia khun. “Ka la don ka jingpynbor, na ki paidbah ba ngan ia khun hynrei nga la rai ban shongthait shuwa” ong u Bah Leston Wanswett u kyrtong shimet uba la rem salit ha u Dr.Don ha kane ka elekshon ba la dep na ka Shella Konstitwensi.
Haba la kylli hato iano ka seng Congress kan pyniakhun na Shella Konstitwensi ha kane ka elekshon ka ban wan u Bah Les u la ong ba ia mynta ym pat don jingtip kaba tikna namarba ka seng kam pat khot aplikeshon na ka bynta kikandidet ki ba thmu ban ia ai-reng ha katei ka elekshon. Hynrei ka la don pat ka jingtip ba na Shella ki la don katto katne ngut ki rangbah kiba la thmu ban pan tiket na ka seng Congress kaba kynthup ia u Bah Pynthymmaibor Chyne, Bah Jropsing Nongkhlaw bad kiwei pat ki riew rangbah katei ka seng.
Shuh shuh ka tyllong khubor kaba la ioh lum la ioh jingtip ba ha Sohra Konstitwensi u Dr.P.W Khongjee u MLA barim ka Congress na Shella u lah ban ym ia khun shu ha kane ka elekshon ka ban wan ha kaba katkum ki thymmei khubor la ioh jingtip ba utei u MLA barim ka sohra u lah ban pyniakhun noh da u Bah Donevan Kharwanlang na ka seng Congress katba la ioh jingtip pat ba nalor u Bah Donevan ba ka seng ka la thmu ban pynieng kin dang don ruh kiwei pat ki riew rangbah kiba ym pat lah ban tip kyrteng ki ban pan tiket na ka seng Congress.
Ka tyllong khubor ba la iohlum jingtip la iathuh ruh ba ha kitei ki ar-tylli ki Konstitwensi ka iew tiket jong Ka seng Congress kan thnam bha namar ki briew kiba don jingthmu ban pan tiket na katei ka seng sain pyrthei kaba don ha ka liang synshar ki dei ki briew kiba don jingiadei kaba jan bad ki Myntri sorkar bad kiwei pat ki don ka jingiadei kaba jan bad ki Nongialam 5radbah ka seng Congress.
Katkum ka jingiathuh u Bah Leston Wanswett , u la ong ba ha Sohra la shu ioh sngew ba u Bah Donevan un long uwei na ki nongpan tiket bad dang don ruh sa uwei pat na Pdengshnong Sohra . Hynrei kaba kham sngewtynnad ka long ba hadien ba la wad jingtip ia u kandidet uba thmu ban pan tiket na ka seng Congress u ba dei na Pdengshnong Sohra ka tyllong khubor Ka la iathuh ba utei u kandidet u dei uwei na ki rangbah uba la sngewthuh ba u dei uba la ioh ka jingkyrshan ba pura na u Myntri sorkar u Bah Prestone Tynsong katba u Bah Donevan u dei u dkhot jong ka seng Congress uba la thmu ban pynieng da u Dr.Khongjee .
Halor kitei ki khubor u nongthoh khubor u la pyrshang ban wad jingtipna ki nongialam Congress jong kitei ki ar-Konstitwensi hynrei namar bym pat khot aplikeshon kim pat lah ban ai jingtip haduh katno ngut kiba kwah tiket na ka seng Congress.
Phi don ban ong eiei?