Shillong: Ka Congress ka la pynbna ba kan ia khih mynta ka sngi ha baroh kawei ka ri India kum ka dak ka jingpyrshah ia ka sorkar NDA ba ialam da ka BJP halor ka jingkiew dor palat ka Petrol bad Diesel ha kine ki sngi. Haba ia kren bad u Rupang u Working President ka Congress u bah James Lyngdoh u la ong ba lashai ka sngi ha ka por mynstep ki briew jong ka Congress kin leit ban shong kyllain mongor ha baroh ki Petrol Pump ha nongbah Shillong bad u la ong ba ha ka por 2:30 baje nohphai sngi kin iaid paidbah na Khyndailad sha Congress Bhawan bad hadien kata kan sa ka don ka jingiakren bad ki nongthohkhubor ha ka ophis jong ka seng Congress.
Lah ban kdew ba ka seng Congress ka la pynbna da ki pakhang shnong ha kiwei pat ki bynta jong ka ri India ban pyrshah ia ka jingkiew dor ka Petrol Diesel kaba manla ka sngi, hynrei u bah James u la ong ba ha kane ka jylla ym lah satia ban leh kumtei naba ka ing kashari ka la khang pyrshang ia ki jingpakhang shnong bad ki hap ban iaid da kawei pat ka lynti.