Yn shem jingeh ka KHADC, lada treikam ka 6th Schedule ka sorkar

Shillong, 26 Jylliew:
Ka PDF ka la ong ba ka 6th Schedule kaba la pynbiang pynbit da ka sorkar jylla ban phah ia ka jingtyrwa ban pynkylla bad pynbeit bha ia ka, kan buh pynban ia ka District council ha ka jingma lada pyntreikam ia ka kumba ka long mynta, wat la ha katei ka jing pynkhreh, ka ka pyni ba ka don ka lad ba ka Council kan lah ban kham pynmih pisa.
“Lada jia ba pyn treikam ia ka kumba ka long mynta, kan buh jingma kaba khraw ia ka District Council” ong u bah Pynshngain N Syiem, CEM KHADC haba jubab ia ki jingkylli ki MDC ka Liang Pyrshah ha ka dorbar mang tyngka ka KHADC kaba la long mynta ka sngi thohdieng. U bah Pynshngain u la ong ruh ba Lada ym weng noh ia ka Para 12(a) jong ka 6th Schedule kan ym don jingmut ia ka District Council namar ba ki ain ka sorkar ka kham khraw ia ki ain ka district Council.
Halor katei ka jingtyrwa pynkylla ia ka 6th Schedule u CEM, u la ong ba donkam ban don ka jingialang jong baroh ki MDC na ka Liang pyrshah bad na ka Liang synshar ban ia phylliew jingmut bha shuwa ban phah ia kaei ka ain pynkhreh jong ka Council. Haba ia shim bynta ha ka jingiatai halor katei ka mat, u bah Adelbert Nongrum, MDC ka KHNAM u la pynpaw ka jingsngewkhia namar ba ka la don ruh ka jingkynnoh ba ha katei ka ain pynkhreh, ka sorkar ban pynkylla 6th Schedule la pynduh ruh ia ki Dorbar shnong.
“Kane ka dei ka jingthmu ban wanrah da ka Panchayati Raj ne ka Municipal ha ka jylla nalor ka jingthmu ban khlong jubor ia u mar pohkhyndew Uranium” ong u bah Adelbert Nongrum uba la kyntu jur ia ka EC ka KHADC ba kan tih bniah bad pan jingshai na ka sorkar kumno ka la leh ia ka jingtyrwa bad ba ka Council ka la phah mynshuwa.
Ha katei ka Dorbar ka la don ruh ka jingiatai kumno ban kyntiew ia ka ioh ka kot bad ka rukom pynmih pisa ka Council ha kaba u CEM u la kular ba ka EC kan thaw ia ki lad ki lynti kumno ban pynmih pisa ia ka Council. U CEM u la pynpaw ruh sha ka ing dorbar ba ka Council ka donkam ia kiba bunbah ki jingtei ban pyn itynnad ia ka kum ka Council Secretariat, ka ing basa (Guest House) bad kiwei pat bad u la ong ba kumba ka long mynta ka Council ka long kaba rit kaba jynjar wat tang ban pynieng kali ruh.