Shillong: Hadien ka rai jong ka sorkar ban shah noh ban plie ia ki dukan ki ba don hapoh iewduh, ka Deputy Commissioner jong ka East Khasi Hills District ka kong Matsiewdor W Nongbri mynta ka sngi ka la pynmih ia ka jing pynbna ba naduh ka sngi nyngkong kata naduh ka 22 tarik u jylliew 2020 tang 413 tylli ki dukan kiba don ha iewduh kin plie ha ka shisngi.
Na ka liang ka Ophis jong ka Hima mylliem ki la dep ban iathuh ba ki dukan ki ba la shah ban plie ki long 1222 tylli bad na ki ne 413 tylli ki lah ban plie shisngi kat kum ka jingbuh da ki dak A,B,C kat kum ka pali bad ki dukan kiba la dep plie kin plie biang hadien ka 2 sngi. Ka iewduh kan plie naduh ka sngi nyngkong haduh ka sngi saitjain bad ha ka sngi u Blei yn ym shah ban plie ia ki dukan baroh.
Ki basa ki ba la shah ban plie ia ki dukan ki long ka basa juti,basa shynrai, basa khiew,basa wait ,basa khoh, basa khaw khasi,basa jain,basa soh, basa kot,Pusari,basa pylleng ,basa khaw ,basa syiar bad ki dukan kiba don ha Standjeep bad second hand.
La bthah ruh ia ki nongdie dukan ba kin bud pyrkhing ia ki kyndon ba la pynmih da ka tnad ka koit ka khiah bad la da lap ba don kiba pynkhein ia kine ki kyndon kin sa shah pynshitom. La thaw ia ka Covid Management Commitee ban peit ia ka jingiaid beit iaid ryntih ban ym don ka jingpynkhein ia ki kyndon ba la buh da ka tnad ka koit ka khiah u nongialam kane ka Commitee u long u Syiem ka Hima Mylliem, ki dkhot ki long baroh ki myntri jong ka Hima Mylliem, ki pulit Syiem bad ki Enforcement jong KHADC.
Ki ba shah khot kyrpang sha kane ka Commitee ki long ka Deputy Commissioner EKHD ka kong B.Ranee Executive Magistrate & Incident Commander jong ka Zone IV bad ka kong DV Lyngdoh Excutive Magistrate, Superintendent Of Police kaba la mihkhmat na ka Zone IV bad DMHO yn mihkhmat da ki Medical Officer.
Phi don ban ong eiei?