Yn set jingkylli hi ki skul ia ki klas IX, ong ka MBOSE

Shillong, 07 Nailur:
Ka Meghalaya Board of School Education (MBoSE) ka la pynmih ia ka jingpynbna ha ka website jongka, ba ki bor skul ki dei ban set jingkylli hi noh ia ki khynnah klas IX ym shuh ban set da ka Board.
Kane ka jingpynbna ka MBoSE la pynmih ha ka 5 tarik Nailur, 2016 da u Executive chairman u Pravin Bakshi.
Ha ka jingpynbna la kdew ba katkum ka jingialang kaba la long ha ka 22 tarik Nailar, 2016, ka MBoSE ka la rai ba ka jingpynialeh ia ka eksamin jong ka klas IX kan iai bteng ha kaba ka Board kan nym ai shuh ia ki jingkylli mynta u snem hynrei dei ban set hi da ki bor pyniaid jong ki skul.
Tangba ka jingset jingkylli kan long katkum ka syllabus bad ia ki jingkylli dei ban buh haduh lai bnai khnang ba ka Board kan ioh ban pynshisha.
“Ka jingpynshong dor ia ka jingai mark bad ka jingpynbna ia ka result kan shong ha ka bor jong ki skul”, la ong ka jingpynbna ka MBoSE bad bynrap ba ha ka por ba pynlong ia ka eksamin, ka Board kan phah ia ki nongleit peit ban pynthikna ba ka eksamin kan long kaba khuid, la ong ka jingpynbna na u Exceutive chairman ka Board.
Lah ban kdew ba ki nonghikai kham mynshwa, hapoh ka lama ka JACATAM ki la dawa ba ka Board ka dei ban aiti beit ha ki bor pyniaid jong ki skul ban set ia ki jingkylli jong ka klas IX hadien ba ka jingleh jong ka MBOSE ban set hi ia ki jingkylli ka la wanrah ia ka jingdkoh kaba bun haduh ba la lait tuh bun ki jingkylli ha man ki skul.