Shillong:Ka Meghalaya Pradesh Congress Committee (MPCC), ka pynshai mynta ka sngi, ba ka seng Congress, kan sei ia ki kandidet jongka, ki ban iakhun na 35-Ranikor bad na 51-South Tura Constituency bad ia kitei ki kandidet, yn sa pynbna paidbah, ynda haba la pynbna ia ka tarik jong kitei ki elekshon shiteng samoi.
Ka MPCC, ka pynsngew ruh ba ka jingpynkhlain ia ka seng, ka dang iaid shakhmat, ha kaba la pyniaid da u lamphang jong katei ka Block, ha ryngkat bad ki dkhot jong ka Ranikor Block Congress Committee (RBCC).
Lah ban pynkynmaw, ba ha ka 15tarik Jylliew 2018, ka Meghalaya Pradesh Congress Committee, ka la thung ia ki nongkitkam jong ka Ranikor Block Congress bad kitei ki kynthup ia U bah Prosperious K Nongmin Convener bad ki dkhot, ki long U Bah Khranglin Lyngkhoi, J.C.Diengngan, Mabadon Nonglyer, U Leenga A.Sangma bad U Haripodo Hajong. Ym tang katta, hynrei ka MPCC, ka la thung ruh ka sngi ia U Phrinly Wanniang, kum U Adhoc President jong ka South West Khasi Hills, Mawkyrwat.