Yn sei ka HSPDP Rambrai da u World Champion

Nongstoin, 18 K’Lyngkot:
Wat la ki bor ba dei peit kim pat pynbna ia ka tarik na ka bynta ka election shiteng samoi sha ka KHADC, hynrei ka Rambrai Jyrngam Constituency kala long kaba la khreh na ka bynta katei ka election shiteng samoi ka ban sa long bad pynbna shen, bad katei ka paw shai hadien ba ka seng HSPDP kala pynkhreh na ka bynta ban sei iala u jong u kyrtong.
Hadien ba ka HSPDP Rambrai Jyrngam Constituency kala aiti bad phah sha baroh 38 tylli ki primary unit na ka bynta ba kin jied iano ki ibit napdeng ki 7 ngut ki nongpan ticket na ka bynta ban ioh iakhun ia ka election sha ka KHADC, na Rambrai Constituency, hynne ka sngi ki na ki 38 PU kiba la iashim bynta ha katei ka jingjied ki poi haduh 31 tylli kiba la pynpoi ruh ia ka rai ka jong ki ha ka jingialang bala pynlong ha ophis jong ka District Council ha Nongstoin.
Katkum kitei ki rai bala wanpoi na ki 31 ki PU kaba khambun ka sur ka leit sha u samla World Champion Paliar u ba ioh ia ka jingbun paid na baroh ki nongpan tiket bad u la ioh ruh ia ka jingkyrshan na ki 21 tylli ki PU bad na ka liang jong ka EC HSPDP Rambrai Jyrngam hapoh ka jingialam jong u bah K.P. Pangniang MLA ka Rambrai kum u President ha ryngkat ka jingdonlang u bah C. Thongni Secretary lem bad baroh ki dkhot jong ki PU kila shim beit ia ka rai jong ki PU bad pynbna syndon ba ka tiket kan leit beit sha u samla World Champion.
Hatei ka sngi la ioh ruh ia ki jingkren na ki katto katne ki nongpan tiket ki bala wan poi ha katei ka jingialang ba kynthup ia u Pynskhemlang Nongshlong, bah Synran Nongshlong, bah Pherik Lyngdoh, bah O. Nongsiej bad bah B. Mawtyllup ha kaba kila pynpaw ba kin ai ka kti ka mon ka kti ka diang na ka bynta ban ai jingkyrshan ia ka party na ka bynta ban ioh ia u soh jong ka jingjop.
Shuh shuh la ioh ruh ia ka jingkren na u samla W.C. Paliar u bala ai khublei ym tang ia ki bala jied bad mon ia u hynrei ia baroh ki PU bad u la ong ruh ba naduh katei ka sngi u la khot bad wer ia baroh ki para nongpan tiket ba kin ailem ia ka jingiatrei lang ym tang na ka bynta ban ioh ia ka jingjop hynrei ban kyntiew ia ka thain Rambrai hi baroh kawei.
Shuh shuh u la ong ruh ba ki rangbah ne longkmie ki don hok ban pyni lem ia ki lad ki lynti bad ban ai jingmut bad u la kular ruh ba naduh katei ka sngi un nymshet kylla ia party bad kumjuh ia ki paidbah.