Yn sdang noh ka jingtih dewiong ha ka jylla, mynjur ka Coal India, ia ki laisen jong ki 5ngut

Shillong:Ka sorkar India, lyngba ka Ministry of Coal, New Delhi, ha ka 6tarik Jymmang 2021, ka la shah ban sdang noh ia ka jingtih dewiong ha ka jylla, da kaba ka ai jing mynjur ia ki 5ngut ki nongtih dewiong, ba la phah, lyngba ka sorkar Meghalaya.

Katei ka hukum, ka bthah, ban bud dien ia ki kyndon, ba la buh, katba kum ka Chapter V jong ka Mineral Concession Rules 1960. Katei ka hukum, ka mih hadien ar bnai, ba la thaw ia ki kyndon trei kam lane ka Standard Operation Procedure, ban tih dewiong ha ka jylla Meghalaya.
Ka National Green Tribunal, ka la khang ban tih dewiong ha ka jylla, ha ka 17tarik Iaiong, 2014.
Ka Ministry of Coal, jong ka sorkar India, ka la ai jingmynjur ia ki laisen jong U bah Shainingstar Khardewsaw, bah Marbiangbor Nongsiej, bah Erantis Sympli bad u Bah Sajay Laloo ha West Khasi Hills bad U bah Teilang Pde ha Southwest Khasi Hills District bad mynta, ka jingtih dewiong, da ka buit saian ba thymmai, kan sa sdang noh shen.

“Ngi ai ka jing ai khublei, ia kane ka sorkar kaba mynta, ha kaba ka la shah shkor ia ki jingeh jong ki trai par dewiong bad ba ka bat ia ka kular ban weng ia ka jingkhang dewiong. Ngi kitbok ia U Conrad Sangma, myntri rangbah, ba un im slem bad ba un ia ki sngi kiba suk nangne shakhmat” ong ka kyrwoh, ba la soi da U Bah Shaingingstar Khardewsaw, na Umtynru, Maweit, West Khasi hills bad nangta U Bah Marbiangbor Nongsiej, Nongpyndeng, Nongstoin, West Khasi hills.