Yn sdang noh ïa ka lynti iaid da ka rope way ha Shillong, ong U bah Paul

Shillong:U Myntri ka kam jngohkai Bah Paul Lyngdoh, ha ka sngi Balang, ula ong ba ka jingshna ïa ka Shillong Ropeway Project kan sa sdang noh naduh u bnai Naiwieng mynta u snem.

Haba ïakren bad ki nongthoh khubor, u Bah Paul ula ong ba dang shen ula lum ïa ka jingïalang ban ïakren ïa kane ka project kaba kongsan tam ha Nongbah Shillong.

Kat kum ka jingong jong u, ka project kan sdang da ka terminal point ha Madan Laban sha Lumparing bad shaduh sha View Point jong u Lum Shillong bad bynrap, “Ngin pynïasoh da 12 tylli ki sainar cable bad ia ka jingshna (engineering) yn leh kat kum ki ropeway ba leh ha Europe”.
“Ngin sa khot ïa ka tender ha u bnai Jymmang bad ka kam ka lah ban sdang ha u bnai Naiwieng mynta u snem,” ula bynrap.

U Myntri ula pyntip ruh ba ula leit ban ïuhkjat ha Orchid Resort, Mawkasiang bad kiwei ki jaka kiba donkam ban nang kyntiew shuh shuh bad ha ryngkat ki Ophisar ka Tnad Jngohkai, ngin sa nang wanrah ïa ki katto katne ki kam thymmai ba kongsan ha kane ka project,” u la ong.
Ula pyntip shuh shuh ba ka Tnat Jngohkai ha ryngkat ka Asian Development Bank (ADB), kin sa wanrah ïa ki project thymmai bad kum ka jingsdang, ka Shillong bad Sohra Circuit kin ïoh mar T. 70 klur bad kine ki project ki dei kiba la tyrwa.