Yn sdang da ki iew shisien shi taiew bad ki khar Assam sha Ampati

Ampati,24 Naitung:
Kum ka jingthmu ban wanrah biang ia ka shong suk shongsain hapdeng ka South West Garo hills bad ka Assam khamtam ia kito kiba shong ha khappud kumta na ka liang jong ka Ampati Zone United Christian Peace Forum, ka la shim ia ka rai ban pynlong iew noh kumba ju long ki iew shnong kaba tang shisien shitaiew, ha kaba yn shah ia ki briew kiba na Assam, ba kin wad ban thied ia ki mar ki mata.
Ia kane ka rai la shim ha ka jingialang paidbah kaba la pynlong mynta ka sngi da ka Ampati Zone UCPF ryng kat ka jingiatreilang bad ka Ampati Citizens Forum ha Ampati Mini Stadium, Southwest Garo Hills.
Haba kren shaphang ki jingdonkam ban wanrah biang ia ka shongsuk shong sain ha ka liang ka ioh ka kot bad ka khaii ka pateng,na ka bynta ka jingmyntoi u luk u lak, u General Secretary ka Ampati Zone UCPF u Wepster G Sangma u la ong ba ka jingdonkam jong katei ka jingialang ka long ban plie ia ka iew na ka bynta ki nongkhaii bar jylla kiba na Assam.
Ha katei ka jingialang la pynbna ruh ba ki nongkhaii na assam ki lah ban wan biang sha Garo hills bad ban bteng biang ia ka khaii pateng jong ki.
U Sangma, ula iathuh shuh shuh ba ha ka jingialang kaba dang shen bad ki heh sorkar, ha kaba la don lang ruh da ki nongkhaii na Assam, ha kaba ki la pynsngew ba ki long kiba la kloi ban wan biang sha Garo Hills, na bynta ka khaii pateng jongki. Ha ka juh ka por u Sangma u la iathuh ba katei ka iew ban shah ia ki nongwan die ne wan thied jingthied na Assam, kan long tang ha Ampati, Kalaichar bad Katli mynta shipor.Hynrei u la pyntip pat ba ka jingwanrung jong ki nongtrei bylla sngi sha ki bynta jong ka South West Garo Hills Disrict, yn pyrkhing bha mynta shipor.
Ha kajuh ka por, na ka liang jong U President ka Ampati Citizen’s Forum U Rana D Sangma, haba kyrshan ia ka jingai jingmut jong U Wepster G Sangma, u la ong ruh ba ha kitei ki iew kin don ruh ki bor pahara ba la buh da ka bor pyniaid District ban ym mih kino kino ki jingjia bad ha kajuh ka por u la kyrpad ruh ia ki paidbah bad ki Nokma ba kin ia treilang ban wanrah biang ia ka shongsuk shongsain.