Yn sar ka Congress ha MDC bad MP, ong u Bah Rowel

Shillong, 8 Nohprah:
U nongialam ka Congress Bah Rowell Lyngdoh u la ong ba ka jingshah rem kput ka Congress ha kiwei ki jylla, kam ktah satia hangne ha Meghalaya na ka bynta ka elekshon MDC bad MP ruh.
“Bun kine ki jylla ki dei ba bun ki briew jong ka BJP. Ngi dei ban sngew thuh ba ka elekshon ha ki jylla la iakhun da ki ishu ba dei jong kano kano ka thain. Namarkata, ban ong ba ka elekshon shabar jylla kan ktah hangne kam nym iahap eiei”, la ong u De puty Chief Minister.
U la ong ba u sngew skhem ba ka Congress kan jop kham bun bha ha ka Lok Sabha bad District Council ban long shen.
“Ki briew jong kane ka jylla kin shaniah beit ha ka Congress ha MDC bad ka MP elekshon”, la ong u bah Rowel.
Ha kajuh ka por, u working president ka UDP u bah Paul Lyngdoh u la ong ba ka jingshah rem kput ka Congress ha kiwei ki jylla kynthup ha Delhi kan ktah jur ia ka Congress ha ka MP elekshon.
“Kane ka pyni shai ia kaei kaban jia. Ka por jong ka Congress ka la kut, ki paidbah ki la kyntait ia ka Congress namar ba ka la klet ia ki nongrim jongka bad ka la kylla long ka party ba khwan spah”, la ong u Bah Paul.
Lah ban kdew ba ka Congress ka la rem kput ha Rajasthan, Delhi, Chatisgarh, bad Madhya Pradesh.
U Bah Paul u la ong ba ka Congress kan sa mad ia u sohjew ha ka MDC bad MP elekshon ban wan ha kane ka jylla.