Yn sangeh treikam ki nonghikai SSA, lada ka Sorkar Jylla kam lah ban pynurlong ia ki jingdawa

Shillong: Hadien ka jingleh mynthi bad ka jingleh bym suidñiew jong ka Sorkar Meghalaya Democratic Alliance(MDA) ban pyntreikam ia ki mat jingdawa jong ki nonghikai skul SSA, kumta ha ka 14 tarik u bnai Nailur 2021 ki nonghikai skul SSA kiba don hapoh ka shatri jong ka Meghalaya SSA School Association ki la pynlong ia ka jingiashong kyllaiñ mongor ha Madan Malki bad ki la don ruh ka jingialang ha kaba ki nongialam jong ka Meghalaya SSA School Association(MSSASA) ki la khyrwit tyngeh ia ka jingbym don jingkitkhlieh jong ka Sorkar Jylla ban siew ia ka tulop jong ki nonghikai skul SSA, kaba la shu iai pynsahteng beit na uwei u bnai sha uwei pat bad kane ka jingleh jong ka Sorkar ka la buh jingeh shikat dei eh ia ki nonghikai skul.

Ha kajuh ka por, u nongialam ba hakhmat jong ka MSSASA, u Bah Aristotle Rymbai u la pynbna ba lada ka Sorkar Jylla kam pyllait ia ka tulop ba sahteng jong ki bad ban pyntreikam noh ia kiwei kiwei ki jingdawa jong ka seng hapoh ka 30 tarik u bnai Risaw 2021, ka seng kan sa pynlong sa kawei ka jingiakhih ha kaba ki nonghikai skul kin shim shuti syndon ar sngi kynthih ka ban long naduh ka 1 tarik u bnai Risaw 2021.