Shillong: Ka kynhun jong nonghikai kolej ha jylla Meghalaya, ha ka shatri jong ka Meghalaya College Teachers Association (MCTA) ka la rai ban sangeh noh ka jingshim klas ia ki 1st Semester hapoh ka kyndon ba ki khot ka Four Year Undergraduate Programe (FYUP) jong ka NEP 2020, kum ka dak ka jingpyrshah ia ka jingshimrai jubor jong ka NEHU ban pyntreikam ia ka National Education Policy (NEP)-2020 naduh ka 1 tarik Nailar.
Ka MCTA, ka la shim ia kane ka rai ha ka jingialang ba ki la ia shong kyrkieh da ka online, kaba dei ruh ka Executive Committee ba la long ha ka janmiet jong ka 29 tarik Naitung. Ia kane la pyntip da u Dr A.War Rani, General Secretary ka MCTA ha ka shithi ba la phah sha ki Unit bapher bapher jong ka MCTA kiba don hapoh ka Jylla.
Namar ka jingshim rai ba kyrkieh ban pyntreikam ia ka NEP-2020, da ka North Eastern Hill University (NEHU) bad halor ka mat jing dawa jong ka MCTA ban weng noh ia ka jingpynbna ba 12 tarik Naitung, 2023, ka Association ha ka jingialang ba kyrkieh jong ka Executive Committee ba long ha ka 29 tarik Naitung, ka la rai ban shim ia ka nongrim ban ialeh pyrshah ia ka rai, ong ka kyrwoh ka MCTA.
Ka MCTA ka la pynrem jur ia ka jingleh bym suidniew bad jingkyntait ban sngap lem ki bor pyniaid ka NEHU ia ka jingsngew jong kiwei khamtam eh u Vice Chancellor, uba la tynruh ban pyntyllun shakhmat ha ka ban pyntreikam ia ka NEP-2020 khlem da uoh jing mynjur na ka Academic Council.
Ka jing sangeh treikam, kan sdang naduh ka 1 tarik Nailar, 2023, tad haduh ban da pynbna da kumwei pat, ha kaba baroh ki dkhot ki dei ban sangeh ka jingshim klas ia ki 1st semester. Nalor kata, la bthah ia ki dkhot ba kin kyntait ia baroh ki jingpynkit khlieh haba iadei bad ka jingpyntreikam ia ka NEP-2023 naduh mynta ka sngi, ong ka shithi.
“Hynrei, haba iadei bad ka 3rd bad 5th semester, ka jingshim klas kan iaid beit khlem kano kano ka jingthut. Namarkata, ki dkhot ki dei ban leit shim klas bad ban pyndep ia ki course kat kum ka por bala buh” la bynrap.
Haba pynpaw ba ka MCTA ka sngewthuh ia ki jingeh ba kane ka rai ka lah ban wanrah, u Dr Rani ula ong, kumba la sakhi ha ki snem ba la leit noh ia ki jingshimkhia/jingkut jingmut ba la ai halor ki nongrim iakhun jong ka Association, ka long kaba donkam ban tylli bad skhem ha ka ban pynthikna ba dei ban burom ia ki rukom treikam jong ki jaka pule bad ruh ban peit lem ia ka bha ka miat jong baroh kiba don bynta, khamtam lei ki samla pule.
nonghikai bun ba la tymmen la thait ai noh da ka vrs,bd replace da kiba nang fresh
kthang ban peit ia ka jinglong ki khasi jong ngi shu ia khih shu ia pyrshah beit ia ka bym dei ruh. ka NEP ka lah hi ban wanrah ia ki jingkylla ba bha ia ki samla pule jong ngi.