Yn sa kiewdor noh ka dud, na ka daw jong ka khajna GST

New Delhi: Ha ka jingialang, kaba 47 jong ka GST Council, ba la lamkhmat da ka Nirmala Sitharaman, myntri pla pisa ka sorkar India, ka la rai ban oh khajna GST noh, na bynta ka dud bad kiwei ki mar, kiba ju pynmih na ka dud bad kitei ki long kum ka malai, u lasi bad ka makhon, kaba pynmih na ka dud. Kitei ki tiar, haduh mynta, kim donkam satia ban siew khajna. Lyngba katei ka jingoh khajna, kumta ia ka dud bad kiwei ki tiar, ban pynmih na ka dud, kin sa kiew dor, naduh lashai ka sngi, ka 18tarik Naitung 2022.

Ha kane ka jingoh khajna, kan treikam ruh ia u ata bad nangta ia ki jingthiah ha ki hospital, kiba shongdor palat ia ka T.5,000 shimiet, ha kaba yn oh khajna 5 percent. Ym tang katta, sa ki kamra thiah ha ki hotel, kiba palat ia ka T.1,000, kin hap siew ia ka GST, kaba 12 percent. Na bynta ki cheque book, yn khein da ki Bank 18 percent na kito kiba pan ia ki cheque book. Ym tang katta, yn pynhap khajna ia u khaw bad u kew ruh, da ka 5 percent.