![](https://www.urupang.com/wp-content/uploads/2023/06/DSC00677-13.jpg)
Shillong:Ka jingialeh ha Shillong hynnin ka sngi jong ka second leg MSL, ka Khliehmawlieh ka bym shym la kamai ei ei ha ka first leg da 1-0, ha ka second leg ka la lah ban kamai 3-1 pyrshah ia ka Mawlai SC ba lah ialeh ha SSA Stadium. Ka Rang dajied pat kaba lah buddien da 3-0 ia ka Shillong Lajong FC ha ka first leg, hynnin ka sngi ka la ioh jop da 3-0 kaba la pynlong ia ka Rangdajied bad ka Lajong ban iadraw ha ka jingiaioh poin da 3-3. Kumta ban pynkut ia ka jingiakhun hapdeng jong ki, la pynialeh noh da ka penalty ha kaba ka Rang dajied ka la jop da 4-3.
Ka jingiakhun hynnin ka sngi ka la long shisha kaba pynlyngngoh bad kaba pynitynnad shikatdei ia kiba bun ia kaba kane ka MSL ka la pynmih mynta u snem. Ka Khliehmawlieh bad ka Rangdajied kin ioh ban shongthait katto katne sngi ha shuwa ba kin iakynduh ha ka jingiakhun ia ka final ha SSA Stadium ha kane ka sngi saitjain ba mynta.
Ha Shillong, ka Mawlai ka la ioh ban lam khmat ia ka jinglehkai hadien ba u Donlad Dieng doh u la ioh ban pynrung ia ka bol shapoh ka jar da kaba pyntyngkhuh khlieh pyrshah ia u nongap ka Khliehmawlieh u Handbill Savio Syiemlieh da ka jingioh bol na u Nikelson Bina.
Da ka jingioh ban thep ia katei ka kol, ka Mawlai ka la ioh ban lam khmat ia ka Khliehmaw lieh da 2-0. Ha kaba sdang jong ka jinglehkai watla, ki la don katto katne ki jingpyr shang jong ka Khlieh mawlieh kiba ikob ban pynkylla ia ka jing lehkai hynrei da ka jingap bha u kol ka Mawlai u Neitho vilie Chalieu bun ki jingpyrshang jong kane ka kynhun ki la shu duh lehnohei.
Ha shuwa ban kut ka kylla step la iohi ba ka Mawlai ka la iada duriap ialade na ka jingwan tur ka liang pyrshah bad da kum ne ka Mawlai kam shym la lah shuh ban phikir ia ka jingwan suh ka bol jong ka liang pyrshah haba u Maining star Marngar u la ioh ban pyneh daw ia ka Khlieh mawlieh ha ka minit kaba khatduh jong ka kylla step kata ha ka 45+1 minit.
Ka kol kaba ar jong ka Khliehmawlieh ka la long haba u Livingstone Nongrang u la ioh ban rah ia ka bol na ka phang ka mon bad ha ka jingpyrshang jong u ban pas ia ka bol, ka la suh beit beit shapoh ka jar kaba la long shisha ka kol ka bym shym la poi pyrkhat.
Haba ka por ka la jan kut, la iohi ba katba ka Mawlai ka la ialeh ban rah ia ka bol shaneng, hynrei da ka jingbym khmih bha ia u nongialeh ka liang pyrshah uba la wan swait na ka phang ka mon bad da ka jingioh kyrshan sa uwei u nongialeh na ka phang ka diang, ki nongialeh ka Khliehmaw lieh ki la ioh ban ia tawiar ia u nongialeh ka Mawlai bad da kumne u Nongrang da ka buit sianti jong u u la lah ban khring sha khmat ia u nongap ka Mawlai u Chalieu bad tang kumne u Kyntiew Myrthong u la ioh ban pynrung ia ka kol kaba lai jong ka Khlieh mawlieh ha ka minit kaba 90.
Haba phai sha Mawkyrwat, ka jingjop jong ka Rangdajied ka la pynpeitmat ia ka Shillong Lajong hadien ka jingioh kiew kyrdan jong ka ha ka I-league. Ha kaba kut jong katei ka jingialeh la iohi ba baroh lai tylli ki kol ki dei kiba lah thep da ki nongialeh kiba rim jong ka SLFC kata u Tremiki Lamurong ha ka minit kaba 32 bad 73 bad ia ka kol kaba lai lah ioh ban thep da uba la mih pli u Batskhem Thangkhiew ha ka minit kaba 56.
Da ka jngiadraw hadien ba la khein ia ka jingioh poin hapdeng kine ki ar kynhun, la hap ban pynkut ia ka jinglehkai da kaba buh noh da ka penalty, bad kum ban shu kynmaw ba ka Lajong ka la pynliem ia ka Rang dajied ha ka samoi ialeh jong ka MSL u snem 2019 da ka penalty, hynrei ha kane ka kynti ka Rang dajied ka la lah ban pyntam ia ka jingioh poin ha kane pat ka jingialeh da 4-3.
Phi don ban ong eiei?