Shillong: U Director ka tnad ka koit ka khiah u Dr Aman War u la iathuh ba shen ka sorkar kan sa iakren bniah halor ban kham pynduna ia ka jingsiew ha kaba iadei bad ka jingtest RT-PCR bad ka Antigen test Kits ha ka jylla.
Haba ia kren bad ki lad pathai khubor na ka liang jong u Dr War u la iathuh ba jingbuh ia ka jingsiew ka ba long T. 3200 na ka bynta ka RTPCR bad ka T. 500 na ka bynta jingtest da ka Rapid Test Kits ka long namr ba ka ICMR ka ba la buh ia ka dor jong kine ki test kits.
U Dr War u la ong ruh ba ka jingbuh ia ka dor ban siew na ka bynta ban leh test ka long ba ka jylla mynshuwa na ka liang jong ka ICMR ka ai hi ia ki testing kits, hynrei mynta ka ICMR kam ai ei shuh kumta la hap ban buh da ka dor.
U la ong ruh ba ka jingsiew kan long tang ia ki briew ki ba kwah ban test hi ia la de hynrei kum ki briew ki ba dei ki High Risk Contact bad ki briew ki ba la bthah ka tnad ka koit ka khiah ba kin leit test bad ki ba don ia ka BPL card ki lait na ka ne ka jingsiew.
U la kyntu ruh ia ki briew ki ba don ia ka BPL card ba lada ki don ka jingpang kaba iasyriem bad ka baiong khlieh, ka bha ba kin leit shim dawai na ki Hospital Sorkar, khnang ba kin lait na kine ki jingsiew.
Phi don ban ong eiei?