Shillong: Ka iing dorbar myn hynnin ka sngi, ka la sakhi ia ka jingwanrah ia ki Bill bapher bapher kiba kynthup naduh ka jingpynkiew ia ka baibam tymmen ki MLA, ki bill ban kham tehlakam ia ki skulbah ha ka jylla.
U myntri ka tnad pule puthi u bah Lahkmen Rymbui u la wanrah ia ka “Meghalaya Private University (Regulation of Establishment and Maintenance of Standard) Bill, 2019.
Ki daw kiba la pynlong ban wanrah ia kane ka bill ka long ban bud ia ka rai jong ka iing bishar ba ha khlieh duh jong ka Ri India ka Supreme Court katkum ka mutkotduma kaba la mudui da u Pro Yashpal pyrshah ia ka sorkar Chattisgarh. Ki kyndon hapoh kane ka Bill ka long ban pyniaid ryntih ia ki skulbah jong ki riew shimet.
Kane ka bill ka long ruh ban pynthikna ba ki skul bah jong ki riew shimet ki dei ban don ia ki jaka hikai kiba biang katkum ka jingdon kam ki khynnah bad kumjuh ia ka bai pule ka jong ki bad na ka bynta ka jingmyntoi jong ka jylla bad ban iada ia ki khynnah kiba pule ha kine ki skul bah jong ki Riew shimet.
U Myntri ba dei peit ia ka tnad pule puthi, ha kane ka sngi u la wanrah ruh ia ka jingpynkylla ia ki ain kiba la don ha kaba ia dei bad ki phra tylli ki skulbah jong ki riew shimet kiba la dep don ha kane ka jylla kiba kynthup ia ka Mahatam Gandhi University (Amendment) Bill, 2019, The University Of Science and Technology (Amendment) Bill, 2019, CMJ University, (Amendment) Bill, 2019, Maharashtra Institute of Technology University of Meghalaya (Amendment) Bill, 2019, The Techno Global University (Amendment) Bill, 2019, Martin Luther Christian University (Amendment) Bill, 2019 and The William Carey University (Amendment) Bill, 2019.
Ha kawei ka liang, u symbud myntri rangbah u bah Prestone Tynsong u la wanrah ia ka bill ban pynkiew baibam tymmen ia ki MLA ka Legislative Assembly of Meghalaya (Members’ Pensions) (Amendment) Bill 2019, bad kumjuh ka Legislative Assembly of Meghalaya (members Salaries & Allowances) (Amendment) Bill 2019.
Phi don ban ong eiei?