Yn pyrkhat ki seng bhalang, ba phah pan map ka ANVC B, ia U MDC Jaiaw

Shillong,25 Jylliew:
Dang ha ki ar ne lai sngi u Bah Adilbert Nongrum u la shah phah panmap ha ka ANVC-B namar ka jingkren jong u ia ka mat long MDC ki Garo ha KHADC ha ka Ing Dorbar ka KHADC. Halor katei ka jingshah phah panmap u Bah Adilbert u Rupang u la twad jingmut na ki Sengbhalang bapher bapher ia ka jingsngew jong ki halor katei ka phang.
Ha ka jingpyrshang ban twad jingmut u Rupang u la ioh ban ia kren bad u President ka FKJGP Central Body Bah Joe Marwein ha kaba u la pynpaw ba na ka liang ka seng kam pat shim kano kano ka sien jam ban ong eiei hynrei shen ka seng kan sa shong jingialang ban pyrkhat halor katei ka phang.
Shuh shuh u Rupang u la ioh ruh ban ia kren bad u General Secretary ka KSU Central Body Bah Auguster Jyrwa, President ka HANM Bah Lam Kharbani ha kaba ki la pynpaw ia kajuh ka jingsngew ba kim pat don eiei ban ong halor katei ka phang bad shen kin sa pynbna pat hadien ba la ia shong pyrkhat.
Ka tyllong khubor ba la iohlum la iathuh ba ka Seng ki samla na Garo ka GSU ka la pynpaw ba ka sngewiahap ia kaei kaba u Bah Adilbert u la wanrah ia ka mat iakren ha ka Ing Dorbar ka KHADC ban don la ki jong ki MDC ha Khasi,Jaintia bad Garo Autonomous District Council. Kham ha shuwa , u Bah Adilbert u la pynpaw ha ki nongthohkhubor ba kaei kaba u la kren kam dei ka jingbakla hynrei ka dei ka jingshisha.