Yn pyrkhat ka sorkar, ban thung da ka kynhun tohkit, halor ka kam tih dewiong beain

Shillong: U myntri rangbah ka jylla u Conrad K Sangma, u la ong ba un sa bishar bniah, halor ka jingai jingmut jong ka liang pyrshah, ban thung da ka kynhun tohkit halor ka kam tih dewiong beain ha ka jylla, hynrei na ka liang jong ka sorkar jylla ka long kaba shai ba kan ym ai lad ia kino kino ki kam beain ba kin trei kam ha ka jylla.

Haba iakren bad ki lad pathai khubor, u Myntri rangbah, u la ong, ba na ka liang jong ka sorkar jylla kan ym ialad ban don ka jingpyntrei beain ha ka ka jylla, ha kaba yn hap ban sngewthuh ba wat la ka don ka ain ban khanglad ia ki kam beain, hynrei ki bun ki kam beain ki ba jia.
“Wat la ka don ka ain ban khang lad, ia ki briew ban leh ia ki kam beain, kum ha kaba iadei bad ka jingpyniap briew, hynrei ka jingshah pyniap ka jia, hynrei ka jingdon jong ka ain ka long ban pyn shitom ia ki briew kiba pynkhein ia ka ain” u la ong.

U Sangma, u la ong ruh “Kum ka kaiphot kaba la ioh, ka long ba na kylleng sawdong kane ka krem la ithuh ba ka dei ka jaka tih dewiong, kaba khlem pyntrei shuh la bun snem, hynrei kaei ka daw ba ki la leit ha katei ka jaka ruh ngim pat tip, hynrei ngi la shu antad ba lah ban long ba ki la thmu ban sdang biang ia ka jingtih dewiongbeain”.
Ha kaba iadei bad ka jingleit iarap ia ki briew kiba dang sah kut ha kane ka krem u Myntri rangbah, u la ong “Ban leit iarap ia ki briew, ka long kaba donkam tam ha ka ba ngin pynthikna ban iada ia ki nongshong shnong ha ka ba ngin leh ia kaei ka ba ngi lah ban iarap ia ki.”

U Myntri rangbah u la pynpaw ruh ba ka jinglong ka suinbeng ka wan rah ia ka jingeh shibun ban leit iarap ia ki, na ka daw ba hap u slap bad la kyrmen ruh ba ynda la rang u slap yn ioh ban leit iarap ia ki ne ki ba sahkut ha kane ka krem.
“Ngi la pan ia ka jingiarap na ka NDRF, kaba la poi ha kane ka jaka bad nga la kyrpad ia u myntri kam pohing ba un leit jurip hi da lade ha kaba u la dep ban wan jurip”u la bynrap. U la ong ruh ba ka NDRF kan sa phah ia ka kaiphot, namar ba ka la poi sha katei ka jaka ban pynthikna ban pyllait im ia ki baroh.