Yn pyrkhat ka sorkar, ban ai lad ïa ki bym poi sha ki jaka eksamin

Shillong: Haba kren sha ki lad pathai khubor mynta ka sngi u Myntri ka Tnad Pule puthi ka sorkar jylla, u Ma Lahkmen Rymbui, u la ïathuh ba na ka liang ka tnad kan sa pyrkhat bad pynmih ruh ïa ka rai ha kine ki shisngi arsngi ban ai lad ïa ki khynnah bym lah ban poi sha ki jaka thoh eksamin, myn hynnin na ka daw ka jingtwa khyndew bad ka jinglynshop ka bor mariang ha ki katto katne ki bynta ka jylla.

Kum ban shu pynkynmaw hangne, ba na ka liang U Rupang, u la ïoh ïakren bad u President ka KSU Border Area u Samla Riskhemlang Khonglah ban wad jingtip ïa ki khynnah ka thaiñ Pynursla kiba ym lah ban poi sha ka jaka thoh eksamin na ka daw ka jingdkut noh ka surok ban leit sha Pynursla bad katkum ka jingtip ba u la ai tang na ki shnong ba sha khappud ki don haduh kumba 20 ngut ki khynnah ba khlem lah ban poi sha ka jaka thoh eksamin.